Հայաստանի Հանրապետական կուսակցություն

 Երևանի քաղաքապետարանում տեղի ունեցած աշխատանքային հերթական խորհրդակցության ժամանակ քաղաքապետ Տարոն Մարգարյանին զեկուցվել է, որ աղբը ոչ սահմանված վայրերում թափելու դեպքերի հայտնաբերման և երևույթի կանխարգելման ուղղությամբ իրականացվող ամենօրյա հսկողության արդյունքում նախորդ շաբաթ 84 վարչական արձանագրություն է կազմվել: Քաղաքապետը հանձնարարել է շարունակել աշխատանքները՝ հատուկ հսկողություն սահմանելով ոչ միայն աղբամաններին հարակից տարածքների, այլև բնակչության կողմից աղբի կուտակման քրոնիկ վայրեր դարձած այլ հասցեների նկատմամբ:
«Մեր նպատակը միայն արձանագրություններ կազմելը չէ, կարևոր է, որ այդ արձանագրությունների միջոցով կանխարգելենք երևույթն ու վերացնենք պատճառները: Այս համատեքստում ոչ պակաս կարևոր է նաև իրավախախտ քաղաքացիների հետ բացատրական աշխատանքներ տանելը՝ առանձնակի ընդգծելով, որ մեր նպատակը ոչ թե տուգանելն է, այլ մեր քաղաքը մաքուր պահելը: Հատուկ ուշադրություն դարձրեք նաև ոչ սահմանված այն վայրերին, որտեղ մշտապես նկատվում է աղբի կուտակում, այդ թվում՝ խաչմերուկներին վարորդների կողմից աղբի և ծխախոտի մնացորդների դուրս նետման դեպքերին: Ճանապարհային ոստիկանության հետ համատեղ քայլեր ձեռնարկեք նաև այդ արատավոր երևույթը վերացնելու ուղղությամբ»,- ընդգծել է Տարոն Մարգարյանը:

Վերջին շրջանում հատկապես Կենտրոն վարչական շրջանում նկատվող նոր աղբամանների հաճախակի այրման դեպքերի հետ կապված էլ քաղաքապետը պատասխանատուներին հանձնարարել է ոստիկանության հետ համատեղ հատուկ հսկողություն սահմանել դրանց նկատմամբ և հայտնաբերել մեղավորներին ու ենթարկել պատասխանատվության: Նշվել է, որ միայն մեկ ամսվա ընթացքում գրանցվել է աղբամանների այրման 20 դեպք:
Բացօթյա ապօրինի առևտրի կանխարգելման աշխատանքների հետ կապված առևտրի և սպասարկումների վարչության պետը զեկուցել է, որ իրականացված հսկողության արդյունքում նախորդ շաբաթ 10 արձանագրություն է կազմվել:
Ապօրինի շինարարության և հողազավթման դեպքերի հայտնաբերման մասով էլ քաղաքաշինության և հողի վերահսկողության վարչության պետը զեկուցել է, որ նախորդ շաբաթվա ընթացքում արձանագրվել է 5 դեպք: 4 հասցեներում կատարվել են ինքնակամ շինարարության հետևանքների վերացման աշխատանքներ: Արձանագրություններ են կազմվել նաև շինհրապարակների կազմակերպման պայմանների խախտման 5 դեպքի մասով: Քաղաքապետը բոլոր պատասխանատուներին, մասնավորապես վարչական շրջանների համապատասխան ծառայություններին հանձնարարել է լինել առավել հետևողական և շարունակել այս ուղղությամբ խիստ հսկողությունը:

Քաղաքապետ Տարոն Մարգարյանը հանձնարարել է ուսումնասիրել մայրաքաղաքում տեղադրված գովազդային վահանակների՝ սահմանված չափորոշիչներին համապատասխանությունն ու, ըստ այդմ, ձեռնարկել անհրաժեշտ քայլեր՝ հնարավորին սեղմ ժամկետում վերացնելով առկա թերությունները:
«Ընդամենը մի քանի տարի առաջ Երևանի քաղաքապետարանը քայլեր ձեռնարկեց մայրաքաղաքում արտաքին գովազդի դաշտում յուրօրինակ մշակույթի ձևավորման, այդպիսով նաև գովազդային վահանակների արդիականացման ուղղությամբ: Նաև գիտեք, որ մենք որդեգրել ենք մի քաղաքականություն, համաձայն որի՝ այժմ փորձում ենք քաղաքաշինական ու հատկապես ճանապարհաշինական աշխատանքների շրջանակում բոլոր տեսակի մալուխներն անցկացնել ստորգետնյա եղանակով: Այս պահանջը դրված է նաև գովազդային նոր վահանակների դեպքում, մինչդեռ շատ հաճախ տեսնում ենք, որ այն ուղղակի չի կատարվում: Մենք արել և անում ենք հնարավորը պարտավորությունների կատարման հարցում տնտեսվարողներին աջակցելու համար, սակայն մայրաքաղաքի նկատմամբ անփույթ և անտարբեր վերաբերմունքը պարզապես անընդունելի է: Ուսումնասիրեք իրավիճակը, կատարեք համապատասխան գույքագրումներ: Եղեք շատ խիստ և հետևողական այս հարցում: Այն ընկերությունները, որոնք չեն ապահովի սահմանված չափորոշիչները, վերանայեք վերջինների հետ գովազդի թույլտվության պայմանագրերը», - ընդգծել է քաղաքապետ Տարոն Մարգարյանը:

Երևանի քաղաքապետարանում և մայրաքաղաքի վարչական շրջաններում գործող «Թեժ գծերի» հեռախոսահամարներով նախորդ շաբաթ ստացվել է համապատասխանաբար 164 և 37 հեռախոսազանգ: Զեկուցվել է, որ բարձրացված հարցերից 168-ը համապատասխան լուծում կամ պատասխան են ստացել: Եվս 33 հարց ուսումնասիրման և կատարման ընթացքում է:
Քաղաքապետի կողմից 2014 թվականի չորրորդ եռամսյակի ընթացքում ընդունված որոշումների և կարգադրությունների կատարման վերաբերյալ վերահսկողության վարչության պետը զեկուցել է, որ քաղաքապետարանի կառուցվածքային ստորաբաժանումների և վարչական շրջանների աշխատակազմերի կողմից քաղաքապետի բոլոր որոշումներն ու կարգադրությունները կատարված են: Տարոն Մարգարյանը հանձնարարել է շարունակել այս ուղղությամբ հետևողական աշխատանքն ու պարբերաբար ներկայացնել համապատասխան տեղեկատվություն: Հանձնարարվել է նաև նախապատրաստական աշխատանքներ տանել մայրաքաղաքի կանաչապատման աշխատանքների կազմակերպման ուղղությամբ: