Հայաստանի Հանրապետական կուսակցություն

 Երևանի քաղաքապետ Տարոն Մարգարյանի գլխավորած պաշտոնական պատվիրակության կազմում Մոսկվա այցելած Երևանի Ավան և Կենտրոն վարչական շրջանների ղեկավարները հանդիպումներ են ունեցել Մոսկվայի Հյուսիսային և Կենտրոն վարչական շրջանների ղեկավարների հետ:
Ողջունելով Երևանից ժամանած գործընկերոջը՝ Վլադիսլավ Բազանչուկը մասնավորապես նշել է, որ, առանձնակի կարևորելով երկու քաղաքների միջև դինամիկ զարգացող և տարեցտարի ընդլայնվող հարաբերությունները, առավել քան ամուր հիմք են ստեղծում քաղաքների վարչական միավորների միջև ևս հարաբերությունները խորացնելու և փոխշահավետ համագործակցություն ծավալելու համար:
Շնորհակալություն հայտնելով ջերմ ընդելության և համագործակցության ընդլայնման պատրաստակամության համար՝ Ավան վարչական շրջանի ղեկավար Մանվել Ջավադյանը նկատել է, որ 2005-2006 թվականներին Մոսկվայի և Երևանի վարչական շրջանների միջև ծավալած փոխգործունեության շրջանակում արդեն իսկ կյանքի են կոչվել տնտեսական, սոցիալական, ինչպես նաև կրթական ուղղվածության մի շարք ծրագրեր և սույնը հաշվի առնելով վստահություն է հայտնել, որ այսուհետ ևս համագործակցությունը կլինի արդյունավետ:
Կենտրոն վարչական շրջանի ղեկավար Արա Սադոյանի և Մոսկվայի Կենտրոն վարչական շրջանի ղեկավար Վիկտոր Ֆուերի հետ հանդիպման շրջանակում կողմերը պայմանավորվածություն են ձեռք բերել ընդլայնելու առկա համագործակցության ծրագրի շրջանակում իրականացվող ծրագրերի ծավալները: Կողմերը մասնավորապես պայմանավորվել են գործուն աջակցություն ցուցաբերել Երևանի թիվ 8 և Մոսկվայի թիվ 1305 դպրոցների միջև փորձի փոխանակման ծրագիրը կյանքի կոչելու հարցում:
Հանդիպումների շրջանակում Երևանի Ավան և Կենտրոն վարչական շրջանների ղեկավարները գործընկերների հետ քննարկել են նաև տարբեր ոլորտներում համատեղ փոխշահավետ ծրագրերի իրականացման հեռանկարներն ու այդ համատեքստում կարևորել Երևանի և Մոսկվայի քաղաքապետերի կողմից ստորագրվելիք Երևան-Մոսկվա 2014-2016 թվականների համագործակցության ծրագրով նախատեսված վարչական երկու շրջանների համագործակցության նոր հնարավորությունները:
Կողմերի պայմանավորվածության համաձայն՝ համագործակցության ծրագրի ստորագրումից հետո առավել կհստակեցվեն գործակցության ուղղություններն ու, ըստ այդմ, կձեռնարկվեն համապատասխան քայլեր: