Լուրեր
Ամփոփվել են բնակչությանը մատուցվող սոցիալական ծառայությունների այս տարվա առաջին կիսամյակի արդյունքները
18.07.2013
Երևանի քաղաքապետ Տարոն Մարգարյանի հանձնարարությամբ քաղաքապետարանի սոցիալական ապահովության վարչության կողմից մշտական հսկողության է իրականացվում սոցիալական ծրագրերի պատշաճ կատարման ուղղությամբ:
Այդ նպատակով պարբերաբար ստուգայցեր են կատարվում սոցիալական ծառայությունների տարածքային բաժիններ`աշխատանքային առօրյային և կարիքավոր բնակչությանը մատուցվող սոցիալական ծառայությունների տրամադրմանը տեղում ծանոթանալու նպատակով:
Վարչական շրջանների աշխատակազմերի սոցիալական բաժինների պետերի և սոցիալական ծառայությունների տարածքային բաժինների պատասխանատուների մասնակցությամբ Ավան վարչական շրջանում հրավիրված քննարկմանը ներկայացվել են 2013 թվականի առաջին կիսամյակում իրականացված և մինչև տարեվերջ նախատեսված ծրագրերը:
Մասնավորապես, ներկայացվել են նաև նույն ժամանակահատվածում սոցիալական ծառայությունների կողմից կարիքավոր բնակչության փաստագրման արդյունքները, ինչպես նաև նշանակված պետական նպաստների և դրանց փաստացի վճարման ցուցանիշները:
Երևանի քաղաքապետարանի աշխատակազմի սոցիալական ապահովության վարչության պետ Ռուզաննա Զաքարյանը նշել է, որ քաղաքապետի հանձնարարությամբ ուշադրության կենտրոնում պետք է շարունակի մնալ կարիքավոր քաղաքացիների կողմից բարձրացվող հարցերի, դիմումների և առաջարկությունների նկատմամբ հսկողությունը` հնարավոր լուծումներ տալու և պատշաճ սոցիալական սպասարկում ապահովելու համար:
Քննարկման մասնակիցները այցելել են նաև վերջերս Ավանում բացված <<Ինտեգրված սոցիալական ծառայությունների համալիր կենտրոն>>, որտեղ բնակչությանը <<Մեկ պատուհան>> և <<Մեկ կանգառ>> սկզբունքով մատուցվում են համալիր սոցիալական ծառայություններ: Ի դեպ, նշենք, որ նման կենտրոններ գործում են նաև Նուբարաշեն, էրեբունի, Աջափնյակ, Դավթաշեն և Նորք-Մարաշ վարչական շրջաններում: