Հայաստանի Հանրապետական կուսակցություն

 Երևանի քաղաքապետ Տարոն Մարգարյանն այցելել է Երևանի քաղաքային ջերմատուն, ծանոթացել մայրաքաղաքի կանաչապատման ու ծաղկապատման ուղղությամբ ընթացիկ աշխատանքներին:
Ներկայացնելով ջերմատանն աճեցվող ծաղկատեսակներն ու դրանց ծավալները` բնապահպանության վարչության պետը զեկուցել է, որ այս տարի արտերկրից ներկրվել և ջերմատանն աճեցվում է շուրջ 1 մլն 200 հազար ծաղկասածիլ, ևս 800 հազարը տեղում է աճեցվել:
Շուտով ծաղկասածիլները կտեղափոխվեն և մայրաքաղաքի բոլոր վարչական շրջաններում կզարդարեն փողոցները, մայթերը, սիզամարգերն ու հանգստի գոտիները: Հենց այստեղ աճեցված ծաղիկներով են ստեղծվելու նաև ծաղկային հետաքրքիր կոմպոզիցիաները:
Ընդհանուր առմամբ ծաղկապատ տարածքների ծավալը մայրաքաղաքում այս տարի կավելանա 1.5 հեկտարով և, շուրջ 2 մլն 200 հազար ծաղկասածիլների շնորհիվ, կկազմի ավելի քան 7 հեկտար:
<<Մայրաքաղաքի կանաչապատման և արտաքին տեսքի ձևավորման գործում շատ կարևոր է նաև ծաղկապատման աշխատանքների ճիշտ կազմակերպումը: Անհրաժեշտ է ընտրել այնպիսի ծաղկատեսակներ, որ մայրաքաղաքում ծաղիկներ ունենանք վաղ գարնանից սկսած մինչև ուշ աշուն: Կարևոր է նաև մեր բնակլիմայական պայմաններին արագ ու հեշտ հարմարվող ծաղկատեսակները տեղում աճեցնելը>>,- ընդգծել է Տարոն Մարգարյանը:
Բնապահպանության վարչության պետը նաև տեղեկացրել է, որ ապրիլի 14-ին հայտարարված համաքաղաքային ծառատունկը պատշաճ մակարդակով կազմակերպելու և անցկացնեու համար նախապատրաստական բոլոր աշխատանքները կատարվել են:
Նշվել է նաև, որ այս տարի, միայն գարնանային ծառատունկի շրջանակում, մայրաքաղաքում կտնկվի շուրջ 40 հազար ծառ և թուփ: