Լուրեր
Նման քաղաքական կերպարները չունեն պատասխանատվություն․ Սարոյան
29.08.2025
ՀՀԿ խորհրդի անդամ Վահագն Սարոյանը ֆեյսբուքյան իր էջում գրել է․
«Ինստիտուցիոնալ պատասխանատվության բացակայության հարցում իշխանությունն իրեն ցույց է տվել բազում կողմերից և դեռ շարունակում է ցույց տալ։ Այլ է պատկերը իշխանություններին սպասարկու ուժերի հարցում, որոնք հաճախ ավելի վտանգավոր են, քան բուն իշխանությունը։
Աչքովս ընկավ Արամ Զավենիչի հայտարարությունները օգոստոսի 8-ի փաստաթղթի վերաբերյալ, թե ինչպիսի գովեստի խոսքերով է փառաբանում դա, ինչպիսի մտքի գոհարներ է ձոնում այդ թղթին և ինչպիսի եռանդով է համոզում իշխանական թեզերի «ճշմարտացիությունը», որոնք ավելի շատ մանիպուլյացիա են։ Ու ակամայից այնպիսի տպավորություն է առաջանում, որ իշխանության սպասարկու «քարոզչական» դեմքերը մտածում են միայն սեփական գրպանի մասին, իսկ պետականության կամ երկարաժամկետ կայունությունը իրենց մտածելիքը չէ, այլ ավելի կարևոր է առօրյա շահույթն ու գործարքը, հովանավորչությունն ու կարճաժամկետ շահախնդրությունը։ Նման քաղաքական կերպարները չունեն պատասխանատվություն, թե ինչպիսին է Հայաստանն այսօր և ինչպիսին կլինի հետագայում, ովքե՞ր են կրելու այսօրվա առաջացած խնդիրների հետևանքները և ի՞նչ զրկանքներ կարող են բերել այսօրվա սխալները։
Դիտարկումները ցույց են տալիս, որ այսպիսի ուժերը հաճախ հանդես են գալիս «քաղաքացիական» կամ «հանրային» դիմակով, հասարակության մեջ մոլորություն են ստեղծում և նսեմացնում են հանրային դիսկուրսը։ Այս առումով իշխանության սպասարկուները իսկապես հաճախ ավելի վնասակար են, քան հենց իշխանությունը։ Նրանք թուլացնում են հասարակության իմունիտետը»։