Հայաստանի Հանրապետական կուսակցություն

ԱԺ «Պատիվ ունեմ» խմբակցության անդամ Աննա Մկրտչյանը «Հրապարակ»-ի հետ զրույցում շեշտում է՝  սա հերթական թուրք-ադրբեջանական պահանջների բավարարումն է, որը  խարխլելու է հայկական պետության առանց այդ էլ թուլացած հիմքերը։

 

«Մինսկի խումբը Նիկոլի կամ Ալիևի ցանկությամբ չի ձևավորվել, որ իրենք լուծարեն: Նիկոլն ընտրվելուց Մինսկի խմբի լուծարման մասին ո՛չ հրապարակային, ո՛չ նախընտրական ծրագրերում չի խոսել: Ինձ համար հասկանալի է, թե ինչու է Ալիևն ուզում լուծարել Մինսկի խումբը: Այդ խմբի համանախագահների մակարդակով բազմաթիվ հայանպաստ հայտարարություններ են ընդունվել: Այստեղ ամրագրված է Արցախի ժողովրդի ինքնորոշման իրավունքը, իսկ քննարկումներն ու Մինսկի խմբի համանախագահների այցելություններն Արցախ, արդեն դե ֆակտո անկախ պետության տարածք, Արցախի իշխանությունների հետ հանդիպումներն ու քննարկումներն Ալիեւի համար տհաճ են: Նա գիտակցում է, որ ցանկացած պահի այն հիմնարար բազան, որ դրված է Միսկի խմբի համանախագահների աշխատանքի հիմքում, կարող է վերակենդանացնել Արցախի խնդիրը: Կարծես այս տրամաբանական շղթան փակում է նաև այն հարցի պատասխանը, թե ինչու է Նիկոլը հայտարարում այն, ինչ ասել է Ալիևը»,- ասաց պատգամավորը:

Աննա Մկրտչյանի խոսքով՝ Փաշինյանի հերթական դավաճանական քայլն է Հայաստանի եւ հայ ժողովրդի նկատմամբ։ 

«Պետության հանդեպ դավաճանությունն ու ազգային շահն ուրանալը հենց այս տեսքն ու գործելաոճն ունի: ԵԱՀԿ-ում շատ բանակցային փաստաթղթեր դեպոնացված են։ Փաստացի այս քայլով Նիկոլն ու Ալիևը փորձում են ուղղակի արխիվացնել այս ամենը՝ ապագայում զրկելով արցախահայությանն այդ փաստաթղթերի հիման վրա իրավական նոր գործընթացներ նախաձեռնելուց: Այսինքն, սպանել Արցախի ժողովրդի իրավունքները, չթողնել գեթ մեկ հնարավորություն՝ ապագայում հարցը բարձրացնելու և արդարացի լուծմանը հասնելու համար»,- նշեց Մկրտչյանը:

Ալիեւի բոլոր պահանջներն անմիջապես կատարելը Փաշինյանին նոր փորձությունների առջեւ կկանգնեցնի, ուստի, ըստ պատգամավորի, Փաշինյանն Ալիեւի պահանջները կկատարի հերթով։

 

«Նիկոլի միակ դիսկոմֆորտն արտահայտվում է միայն այն բանում, որ պահանջների ամբողջ սպեկտրը միանգամից բավարարելն իր համար սպառնալիք կարող է լինել հայ ժողովրդին խաբելու ու մոլորեցնելու ճանապարհին: Այդ իսկ պատճառով պահանջներն առաջարկում է ներկայացնել հերթով եւ ապահովում է դրանց անշեղ կատարումը՝ հայ ժողովրդի հաշվին: 

 

«Սելը չի ճռռում, սելվորն է ճռռում»: Նիկոլը բերել հասցրել է այնտեղ, որ ագրեսոր Ալիևին, հայ գերիներին խոշտանգող Ալիևին, Արցախում էթնիկ զտում ու ցեղասպանություն իրագործող Ալիևին, մեկը, որ միջազգային մի շարք կառույցների կողմից բնութագրվում է կոռումպացված բռնապետ, նույնիսկ սեփական ժողովրդի նկատմամբ անողոք հանցագործությունների հեղինակին ասում է կիրթ գործընկեր: Ի՞նչ է, եթե ոչ դիտավորություն այն փաստը, որ Նիկոլն այդ պատերազմական հանցագործին անվանում է կիրթ, կառուցողական ու խաղաղ»,- նշեց պատգամավորը: 

Թուրքերը, ըստ նրա, դարեր շարունակ զինաթափել ու կոտորել են խաղաղ հայ բնակչությանը, հիմա էլ նույնն են ուզում, այս անգամ՝ ուղղակի Նիկոլի ձեռքով: 

 

«Մեզ համար նվաստացուցիչ է, որ Նիկոլն է այսօրվա Հայաստանի իրականությունը: Մենք մեր բարեկամների, մեր թշնամիների դեմքերը շատ լավ իմացել ենք միշտ, բայց Նիկոլի դավադրությունները մեզ զրկում են սթափ ու համարժեք պատասխան տալու հնարավորությունից: Ամենայն անկեղծությամբ, ուշացել ենք և ուշանում ենք ամեն օր: Նիկոլի ամեն օրը կրկնապատկում է նախորդ օրվա վտանգները: Ժողովուրդն անտարբեր չէ, դա Նիկոլի ու իր հանցախմբի խոսույթն է: Ուզում են մեզ համոզել, որ մեր ճակատագիրը մեզ հետաքրքիր չէ, որ մեզ միևնույն է մեր հայրենիքը: Նիկոլը խրախուսում է հայրենավաճառությունը, պատժում հայրենասերներին, Նիկոլը խրախուսում է ուրացումը, պատժում հիշողություն ունեցողներին: ՀՀ քաղաքացիների գերակշիռ մեծամասնութունը գիտի իրականությունը, մեր հասարակության համար ճշմարտությունն ակնհայտ է, Նիկոլի դավաճանությունը` ակներև: Մեզ հարկավոր է հաղթահարել վախերը, պատրաստ լինել եւ միասնության մեջ անցնել մեծ դժավարությունների միջով: Մեր հասարակությունն ինքն իրեն պիտի խոստովանի` իրենց խաբել են 18-ին, 21-ին, խաբում են հիմա: Կատարվածն ունի կոնկրետ մեղավորներ, այդ մեղավորությունը վերացական դարձնել ու անէացնելն անթույլատրելի,- ասաց ԱԺ պատգամավորը: