Հայաստանի Հանրապետական կուսակցություն

 Նոր տարվա նախօրեին «Պատիվ ունեմ» խմբակցության քարտուղար Տիգրան Աբրահամյանին խնդրել ենք ամփոփել 2024 թվականը՝ որպես անվտանգային տարի:

«2024 թվականն անվտանգության խոցելիության աճի, անվտանգային համակարգը պատշաճ մակարդակի հասցնելու տեսանկյունից՝ հետընթացի և իշխանության կողմից զինված ուժերին հասցված հարվածների առումով, չասեմ աննախադեպ, բայց զգալի խնդիրներ հարուցող տարի էր: Անվտանգության և պաշտպանության հետ կապված բազմաթիվ ուղղություններ կան, որոնց հետ կապված կարելի է երկար խոսել:

Բայց հիմնականն այն է, որ կառավարությունը շարունակում է սխալ ուղղությամբ գնալ:

Իհարկե, կան ծրագրեր, որոնք որոշ առումով իրենցից բարելավում ներկայացնում են, սակայն հիմնական ուղղություններն ու առաջնահերթությունները, որոնք սահմանել է կառավարությունը և դրանցով շարժվում է, դրանք Հայաստանին ոչ միայն սահմանված հանգրվանին չեն հասցնելու, այլ եղած խնդիրները կամ խորացնում են, կամ նորանոր հարցեր են հարուցում:

Իսկ աշխարհաքաղաքական տեսանկյունից այն միջավայրը, որը ձևավորվել է Հայաստանի շուրջ, ոչ միայն մեր զարգացման համար բարենպաստ դաշտ չի ապահովել, այլ գնալով դրանց բնութագրումները շատ ավելի մութ, մուգ և ոչ լավատեսական ֆոն են ձևավորել:

Դրան զուգահեռ՝ մեր նկատմամբ հիմնական թշնամական տրամադրված երկրները՝ Թուրքիան և Ադրբեջանը, շարունակել են մեր երկրի նկատմամբ տարածքային պահանջների ընդլայնումը, ճնշման և շանտաժի քաղաքականությունը, իսկ հայկական դիվանագիտության անգործությունը կամ ձախողումները Հայաստանին գնալով շատ ավելի վատ դիրքային իրավիճակ են հրում»:

Մարիամ Պետրոսյան

168.am