Լուրեր

Խեղաթյուրված հայոց պատմությո՞ւն, թե՞ ՔՊ վրեժի ժամը. ահազանգում է Տիգրան Վարդանյանը

08.06.2022

 ՀՀԿ խորհրդի անդամ Տիգրան Վարդանյանն իր ֆեյսբուքյան էջում արձանագրել է, որ 2018 թ. հայտնի իրադարձություններից հետո տպագրված «Հայոց պատմության» դասագրքերի բովանդակությունը խեղաթյուրված է: Նկատենք՝ դասագրքերը տպագրվել են 2019 թ.-ին, երբ ԿԳՄՍ նախարարի պաշտոնը զբաղեցնում էր իմքայլական Արայիկ Հարությունյանը:

 

«Մեկ Բաքվի բռնապետ Ալիևնա մեր պատմությունը փորձում խմբագրել, մեկ էլ իր ճորտ Նիկոլն իր ուսապարկերով: Ուրեմն 9-րդ դասարանի «Հայոց պատմություն» 2-րդ մասի գրքում` «ներքաղաքական զարգացումները 21-րդ դարի սկզբին» բաժնում գրված է հետևյալը` «1998-2008թթ. ընտրակեղծիքներով ՀՀ նախագահ ընտրվեց Ռ. Քոչարյանը, իսկ 2008-ից հետո 2 անգամ նախագահական ընտրություններում դարձյալ ընտրակեղծիքներով հաղթել է Սերժ Սարգսյանը»: Հետո գրել են, որ «ամբողջ մոլորակը սովորեց հայ ժողովրդից, թե ինչպես պիտի հեղափոխություն անել»,- գրել է Տիգրան Վարդանյանը:

ՀՀԿ անդամը շեշտել է, որ թեև Ռ.Քոչարյանի, Ս. Սարգսյանի իշխանության տարիներին եղել են սխալներ, բացթողումներ, հասարակության հետ կապի որոշակի բացակայություն, բայց փաստ է նաև, որ այդ բոլոր բացթողումներով ու սխալներով հանդերձ՝ ՀՀ 2-րդ և 3-րդ նախագահները հաղթել են Իլհամ Ալիևի հորը` Հեյդարին, առաջին պատերազմում, իսկ Սերժ Սարգսյանը հաղթել է նաև 2016թ. Քառօրյա պատերազմի ժամանակ:

 

«Փաստ է, որ դուք, ձեր ծնողները, հասակակիցները մեծացել եք այնպիսի Հայաստանում, որտեղ եռագույնները ծածանվել են մեր բանակի հաղթական շքերթներին, այլ ոչ թե Եռաբլուրում, որտեղ արցունքն ուրախության է եղել, այլ ոչ թե ողբերգության:

Հարգելի դպրոցականներ,

Իրականում 2018թ.-ին տեղի է ունեցել հակաղարաբաղյան` հակահայկական շարժում, որն իրականացրել է ոչ թե Հայ ժողովուրդը, այլ` արտաքին ուժերն իրենց տեղի խամաճիկների հետ միասին: Ամբողջ մոլորակը ոչ թե հայերից սովորել է հեղափոխություն անել, այլ տեսել է, թե ինչպես են մոլորված մարդիկ տրվում մանիպուլյացիայի, ստի, կեղծիքի ու սկսում քանդել սեփական պետությունը: Ձեր ուսուցիչներին հարցրեք, ի՞նչ տվեց հեղափոխությունը Հայաստանին, Արցախին, Սփյուռքին: Եթե ադեկվատ, խելացի, հայրենասեր ուսուցիչ է, ուրեմն կպատասխանի, որ ոչ մի լավ բան` Արցախի ճնշող մեծամասնության կորուստ, հազարավոր զոհեր, հաշմանդամ դարձածներ ու անտուն մնացած մարդիկ, հարյուրավոր գերիներ, պետականության դե յուրե կորուստ, պատվի, նամուսի, արժանապատվության կորուստ:

 

Սիրելի դպրոցականներ,

փաստ է, որ Նիկոլ Փաշինյանը հողատու է, կապիտուլյանտ է և դավաճան է: Խնդրում եմ ձեզ, որպեսզի էդ սրիկայի ու իր խունտայի լոլոները չդարձնեք ձեզ համար բացարձակ ճշմարտություն: Հենց ինքը Նիկոլը` ստի ու կեղծիքի, դավաճանության ու ստորության, տականքության ու տգիտության մարմնացումն է: Չլինեք ու չդառնաք Նիկոլ:

Շուտով մենք «կազատագրենք» նաև ձեր դպրոցներն ու գրքերը, ձեզ ու ձեր ուսուցիչներին հայի տականքներից:

Ապրեք ու մեծացեք հայեցի: Կրթվեք ու սիրեք ձեր Հայրենիքը»,- մանրամասնել է Տիգրան Վարդանյանը:

ՀՀԿ խորհրդի անդամը գրառմանը կից տեղադրել է նաև այդ դասագրքերի ուշագրավ էջերից մի քանի լուսապատճենները՝ ընդգծումներով, որոնցից, օրինակ, տեղեկանում ենք, որ 2018 թվականին տեղի է ունեցել «անզեն-անարյուն հեղափոխություն՝ ժողովրդավարության աստեղային ժամը, երբ ողջ մոլորակը սովորեց հայ ժողովրդից՝ ինչպես հեղափոխություն անել»:

← Վերադառնալ ցուցակին