Հայաստանի Հանրապետական կուսակցություն

 

Լրագրողների հետ զրույցում պատգամավորը շեշտեց, որ խորհրդարանական ընդդիմության բոլոր պահանջներն իշխանության ներկայացուցիչներից՝ պարզաբանել, թե ինչ վիճակում է այժմ բանակցային գործընթացը, անտեսվում են։

 

««Պատիվ ունեմ» խմբակցությունը դրա հետ կապված առաջարկելու է օրենսդրական փոփոխություններ, որպեսզի նրանք չկարողանան դրանից խուսափել, բայց թշնամի երկրների ղեկավարների, Հայաստանի Հանրապետության բանակցողների ընդհանուր հռետորաբանության վերլուծությունը հուշում է, որ որևէ լավ բան այդտեղից ակնկալել շատ դժվար է», – ասաց Հայկ Մամիջանյանը։

 

Նրա խոսքով՝ ստեղծված իրավիճակում հայկական կողմի «իբր բանակցողները» պետք է կարողանան գոնե այնպես անել, որ Արցախի կարգավիճակի, առհասարակ, արցախյան հիմնախնդրի լուծումը պահպանվի ԵԱՀԿ Մինսկի խմբի ձևաչափում։

 

«Թշնամին անընդհատ փորձում է գեներացնել նոր հարթակներ, շրջանցել, խնդիրը տեղափոխել այլ հարթակներ, ինչը Հայաստանի Հանրապետության տեսանկյունից դիվանագիտական ինքնասպանություն է», – ասաց Մամիջանյանը։

 

Համեմատելով ՄԱԿ-ում Իլհամ Ալիևի և Նիկոլ Փաշինյանի ելույթները, նա ընդգծեց, որ եթե այդպիսին է Փաշինյանի հրապարակային խոսքը, ապա հարց է առաջանում, թե փակ հանդիպումների ժամանակ նա ինչ է խոսում ու խոսելու։

 

«Հայկական կողմը պարտադիր ու անդադար պետք է միջազգային օրակարգում պահի հայկական տարածքների՝ Շուշիի, Հադրութի դեօկուպացիայի հարցը։ Համաշխարհային հանրության համար պետք է ընկալելի և պարզ լինի, որ դրանք հայկական հողեր են, մեր հայրենիքն են, որն օկուպացված է թշնամու կողմից։ Երկրորդը՝ ԼՂ հիմնախնդիրը պետք է մշտապես պահվի միջազգային հանրության և գոնե հայկական օրակարգի առաջնային կետերում։ Թե որքանով է դա արվում, տեսնում ենք բոլորս», – ասաց «Պատիվ ունեմ» խմբակցության պատգամավորը։