Լուրեր

Արցախը երբեք չի լինելու Ադրբեջանի կազմում․ Հայկ Մամիջանյանը պատասխանել է Իլհամ Ալիևին

17.08.2021

 Իլհամ Ալիևը, հայտարարելով, թե Արցախում ռազմական գործողությունները Ադրբեջանի համար «ազատության համար մղվող պատերազմ» էր, այսպիսով ընդունեց, որ պատերազմական գործողությունների հեղինակն ու սանձազերծողն ինքն է, ինչը չպիտի վրիպի միջազգային հանրության ուշադրությունից, խորհրդարանի ամբիոնից, արձագանքելով Ադրբեջանի նախագահ Իլհամ Ալիևի մի շարք պնդումներին, հայտարարեց ԱԺ «Պատիվ ունեմ» խմբակցության քարտուղար Հայկ Մամիջանյանը։ 

 
Մամիջանյանն անդրադարձավ նաև Ալիևի գնահատականին՝ տրված ՀՀ-ի և ՌԴ-ի միջև հարաբերություններին։
 
 «Ես ուզում եմ հիշեցնել թշնամի երկրի ղեկավարին, որ Հայաստանի Հանրապետությունը հանդիսանում է Արցախի Հանրապետության անվտանգության երաշխավորը։ Ադրբեջանը իրավունք չունի իր քիթը խոթել Հայաստանի և նրա ստրատեգիկ գործընկերոջ հարաբերությունների մեջ։ Վերահաստատում եմ, որ մեր երկկողմ հարաբերությունները կարևորագույն ասպեկտ են տարածաշրջանային անվտանգության համար։
 
Ալիևը կասկածի տակ դրեց, թե ինչու մեր ստրատեգիական գործընկերը պիտի աջակցի և համագործակցի մեզ հետ սպառազինության հարցում, սակայն Ադրբեջանն է եղել այն պետությունը, որը տարածաշրջանում սկսել է սպառազինության մրցավազքը», – ասաց պատգամավորը։
 
Հայկ Մամիջանյանն ընդգծեց նաև, որ Հայաստանի իշխանությունները, բանակցային գործընթացի մասին հայտարարելիս, առաջին ու ամենակարևոր նախապայման պետք է դարձնեն Ադրբեջանում պահվող գերիների վերադարձը հայրենիք և Արցախի կարգավիճակի հստակեցումը։
 
«Ավարտելով թշնամուն ուղղված նախադասությունը՝ ևս մեկ անգամ պետք է հիշեցնեմ, որ Արցախը երբե՛ք չի լինելու Ադրբեջանի կազմում», – իր խոսքն ամփոփեց պատգամավորը։
henarn.am

← Վերադառնալ ցուցակին