Հայաստանի Հանրապետական կուսակցություն

 

«Եթե Նիկոլ Փաշինյանը մեր 5000 զոհերին, Շուշին ու Հադրութը հետ է բերել, նոյեմբերի 9-ի և հունվարի 11-ի նվաստացումները հետ է բերել, Սև լճի տարածքից ադրբեջանցիներին դուրս է հանել, Սյունիքի և Գեղարքունիքի մարզերի որոշակի հատվածներ թշնամու հսկողությունից ազատել է, գերիներին  հետ է վերադարձրել հայրենիք, անհայտ կորածներին հայտնաբերել է, ապա կարող ենք խոսել ճգնաժամի հաղթահարման մասին։  Ի՞նչ է նշանակում՝ ճգնաժամի հաղթահարում, հո չե՞ն ցեխոտվել կամ փոշոտվել, որ լողանան կամ շորը լվանանան՝ ցեխն անցնի։ Ես չգիտեմ՝ ում համար ինչպես, բայց ինձ համար այդ ցավը չի անցնելու։ Այսինքն՝ Արցախի հարցը լուծե՞լ է, որ ճգնաժամը հաղթահարված է համարում, կամ՝ Հայաստանի անվտանգության հարցը։ Ես այս իշխանությունների անադեկվատության վրա եմ զարմանում, այս կապիտուլյանտները գիտեն՝ եթե մի քանի հոգով մանդատ ստացան, ճգնաժամը լուծվեց։ Հայաստանում ճգնաժամը չի կարող լուծվել, քանի դեռ կապիտուլյանտն իր աթոռին է և քանի դեռ այդ ճգնաժամի պատճառներն առկա են։ Սրանք զուլում են»,- 168.am–ի հետ զրույցում ասաց Էդուարդ Շարմազանովը։

 

Ըստ նրա, եթե նույնիսկ 3 կամ 10 միլիոն հայություն Նիկոլ Փաշինյանին ձայն տա, դրանից փաստերը չեն փոխվում, ավելին՝ Նիկոլ Փաշինյանի հայտարարություններից տպավորություն է ստեղծվում, թե նա Հայաստանում բոլոր հարցերը լուծել է և դրանով լուծել է ճգնաժամը, մինչդեռ նրա իշխանության բերած բոլոր խնդիրները շարունակում են չլուծված մնալ։

 

«Թուրքը կանգնած կրակում է Երասխի վրա, կապիտուլյանտն ասում է, թե ճգնաժամը հաղթահարված է՝ «Ребята, давайте жить дружно»։ Սա հիմա նույն բանն է կրկնում․ Արցախի 44-օրյա պատերազմից առաջ ինքն ու Ալիևը սկսեցին միմյանց հետ խաղալ, ու կռիվ սկսվեց,  արդեն երկու կառավարության նիստ սրանք մտել են, այսպես ասած, ազգային գործչի կերպարի մեջ, թե որևէ սադրանք թույլ չեն տա, նո՞ր են հիշել, որ չպետք է թույլ տային։

 

Կարո՞ղ է՝ ես էի ասում, թե Սևի լճի 30 տոկոսի համար հո պատերազմ չե՞նք սկսելու, ինքն էր, չէ՞, ասում, հիմա էլ մտել է ազգային գործչի կերպարի մեջ։ Պատերազմից մեկ օր առաջ ասել էի, որ բորշը սարքեց Նիկոլը, «ջառմեն» կքաշի ժողովուրդը, ու ասել էի, որ կոմպրոմատների պատերազմը բերելու է իրական պատերազմի։ Շատ հավանական եմ համարում, որ այս փոխհրաձգությունը՝ ադրբեջանաթուրքական ղեկավարների միջև, երկրորդ ռաունդն է՝ նույնը բանը կրկնվում է։ Երեք ամիս է՝ թուրքը Հայաստանում է, Արմեն Գրիգորյանը նո՞ր է հիշել, որ պետք է դեսպաններին կանչի ու ասի, որ ամբողջ գործիքակազմը կօգտագործեն։ Սրանք կենաց ասողներ են, բացի կենաց ասելուց, ի՞նչ կարող են անել, երեք ամիս է՝ այդ գործիքակազմն ինչո՞ւ չեն օգտագործում»,- հավելեց Է. Շարմազանովը։

 

Ինչ վերաբերում է Նիկոլ Փաշինյանի հայտարարությանը, թե հանուն Հայաստանի զարգացման պատրաստ է համագործակցել «Հայաստան» և «Պատիվ ունեմ» դաշինքների հետ, Էդուարդ Շարմազանովն ասաց, որ դաշինքներից կարող են դրան արձագանքել, սակայն իր անձնական կարծիքով՝ Հայաստանը քանդողի հետ ինչպե՞ս պետք է համագործակցեն։

 

«Չագուչը գլխիս խփողի հետ գնամ համագործակցե՞մ, հո ես քաղաքական ղազ չե՞մ, ով քաղաքական ղազ է, թող գնա՝ համագործակցի։ Ով ուզում է «կզի», թող գնա՝ համագործակցի։ Կամ՝ հանուն Հայաստանի ինչո՞ւ պետք է համագործակցեմ իր հետ, որ սահմանը պահած համայնքապետերին բռնո՞ւմ է, կամ՝ նրա համար համագործակցեմ, որ չագուչը ձեռքին ֆռֆռո՞ւմ էր, որ երկիրը սարքել է  տոտալիտար համակարգ, որ գնում է Ալիևին տեսնելու՝ վախենում է մեկ բան ասի՞, Պուտինի հետ էլ հանդիպմանն Արցախ բառը չի օգտագործո՞ւմ։ Այսինքն՝ ինչի՞ շուրջ համագործակցենք, կամ համագործակցել ասելով՝ ի՞նչ նկատի ունի։

 

Ով հաճախորդ է, թող նրա հետ համագործակցի, ինչ ասեմ։ Բանակը քանդողի, եկեղեցի վարկաբեկողի, Արցախի 75 տոկոսը հանձնողի, Ալիևին կառուցողական համարողի հետ ի՞նչ համագործակցեմ։ Կամ՝ որ շնորհավորում է, ո՞ւմ է շնորհավորում, առավոտից իրիկուն այդ դաշինքների ղեկավարների հասցեին ցեխ էր շպրտում։ Եթե խնդիրը վերաբերում է նրան, որ պատվիրակություններում, որտեղ ընդդիմությունն ու իշխանությունը պետք է պաշտպանեն ՀՀ-ի շահերը, ապա պետք է դա անեն, սակայն դա իր հետ համագործակցություն չէ, դա հանուն պետականության միշտ էլ այդպես է եղել։

 

Ինքը չլինի՝ պոլի փայտը լինի, նման դեպքերում միշտ էլ այդպես է եղել։ Կապիտուլյանտն ու ազգային զարգացումն իրար հետ այնքան կապ ունեն, որքան Հիտլերն ու քրիստոնեությունը»,- շեշտեց ՀՀԿ ԳՄ ներկայացուցիչը։

 

Հիշեցնենք, որ Կառավարության այսօրվա նիստում Նիկոլ Փաշինյանը շնորհավորեց արտահերթ խորհրդարանական ընտրությունների արդյունքում խորհրդարան անցած քաղաքական ուժերին, ընդգծելով, որ ՀՀ պատմության մեջ առաջին անգամ արտահերթ ընտրությունները դարձել են ճգնաժամի լուծման միջոց, մինչդեռ նախկինում ընտրությունները ստեղծել են ներքաղաքական ճգնաժամ։ Միաժամանակ նա շեշտեց, որ հանուն Հայաստանի զարգացման՝ պատրաստ են համագործակցել խորհրդարան անցած երկու ուժերի՝ «Հայաստան» և «Պատիվ ունեմ» դաշինքների հետ։