Հայաստանի Հանրապետական կուսակցություն

 

Մեր Հայրենիքի վիճակով մտահոգ՝ ընտրապայքարի են դուրս եկել 26 կուսակցություններ ու դաշինքներ  և մեկ շաբաթից ավելին  տարբեր հարթակներից, տարբեր ձևաչափերով ներկայացնում են իրենց ծրագրերն ու մոտեցումները, փորձում ընտրողներին համոզել, որ գալով իշխանության կկարողանան շտկել այս ծանրագույն վիճակը: Կուսակցությունների ղեկավարներից  ու համակարգող մարմիններից շատերը,  չհամակերպվելով ստեղծված աննախադեպ  վիճակի հետ, չհաշտվելով պատերազմում կրած պարտության և ունեցած կորուստների՝  զոհերի, գերիների, հաշմանդամություն ստացած անձանց ահռելի քանակի  հետ, տեսնելով մեր ժողովրդի հուսահատ  վիճակը, առնչվելով կառավարման համակարգի  անկարողության հետ, հասկանալով, որ 2020թ. նոյեմբերի 9-ին ոչ միայն հանձնվեց  Հայրենիքի զգալի հատվածը, մեր հարյուրավոր գյուղերն ու քաղաքները, մեր դպրոցներն ու մանկապարտեզները, հուշարձանները, սրբատեղիներն ու շիրիմները, խոր ցավով արձանագրում են, որ այսօր  թշնամին օղակի  մեջ է առել Հայաստանը, անարգել խորանում է մեր սահմաներից ներս, գերեվարում ու սպանում է մեր զինվորներին, ուստի ջանք չեն խնայում շտկել իրավիճակը և այդ նպատակով սահմանադրաիրավական ճանապարհով փորձում են գալ իշխանության և փրկել Հայրենիքը:

 

Կան կուսակցության ղեկավարներ, ովքեր հարկադրված,  կարճ ժամանակամիջոցում,  ՀՀ օրենսդրության համաձայն   հիմնադրեցին կուսակցություն և մտան ընտրապայքարի մեջ: Անցած  օրերին դուք համոզվեցիք, թե որքան ալեկոծ, մոլորված, չկողմնորոշված է մեր ընտրողը: Դուք նաև համոզվեցիք, որ շատերը ձեզ չեն ճանաչում, կարծես նրանց  ծրագրերն էլ չի հետաքրքրում: Մեր ընտրազանգվածի մի ստվար հատվածին իրավացիորեն հուզում է երկրի անվտանգության խնդիրը և խաղաղ երկինք, ապահով և ուժեղ Հայաստան ունենալու հեռանկարը: 

 

Այժմ եկել է քարոզարշավի ընթացքը լրջորեն վերլուծելու պահը՝ հասկանալու համար, թե ձեր ուժերը, հնարավորությունները, կարողությունները արդյո՞ք այնպիսին  են, որ կկարողանաք երկիրն առաջնորդել դեպի ուժեղ Հայաստան, դեպի անվտանգ և հզոր Հայաստան, որի համար անհրաժեշտ է ճանաչում, քաղաքական և աշխատանքային փորձ, կատարված գործեր: Ակնհայտ է, որ  որոշակի հանգամանքների բերումով հնարավոր է րոպեի ընթացքում հերոսանալ,   սակայն անուն, պատիվ, ճանաչում, իրական վաստակ ձեռք  են բերում  քրտնաջան աշխատանքի, երկարաժամկետ գործունեության ընթացքում: 

 

Այսպիսով, հաշվի առնելով այն, որ 

ընտրողը 26 կուսակցությունների և դաշինքների քարոզչությունը լսելով՝ ավելի է խճճվում, ելնելով  Հայրենիքի նկատմամբ ձեր տածած անսահման սիրուց ու մտահոգությունից,ելնելով մեր պետության օրհասական վիճակից ու  Հայրենիքի և ազգի շահերից,հորդորում, խնդրում եմ կանգ առնել,  ծանր ու թեթև անել. առնվազն 15 կուսակցություն այսօր ի վիճակի  են իրենց  մեջ ուժ գտնել և իրենց  ղեկավար մարմիններում քննարկել  ընտրապայքարից դուրս գալու հարցը՝ կագնելով այն ուժերի կողքին, որոնք հնարավորություն ունեն հունիսի 20-ին ընտրվել և մուտք գործել  Ազգային ժողով: 

 

Համոզված եմ, որ ձեր այդ ազգաշահ   քայլով ձեռք կբերեք ավելի շատ համակիրներ և  կարժանանաք համընդհանուր ու խոր հարգանքի, կպարզեցնեք և կհեշտացնեք ընտրությունների գործընթացը և  կնպաստեք մեր ծվատվող Հայրենիքի շուտափույթ փրկությանն ու ապաքինմանը:

Անսում եմ ձեր բոլորի սթափ մոտեցմանը և հայցում ձեր  ըմբռնումն ու ներողամտությունը:

Հարգանքով և խորին մտահոգությամբ՝ 

 

Հրանուշ Հակոբյան»: