Հայաստանի Հանրապետական կուսակցություն

 

«Այս մասին ՀՀԿ-ն և անձամբ ես բարձրաձայնել եմ 2018 թվականին խորհրդարանում, երբ Կառավարությունն իր ծրագիրն էր բերել: Ես այդ ժամանակ հստակ նշել եմ, որ ծրագրում հայագիտության դեմ որևէ բառ չկա: Ակնհայտ է, որ ազգայինի և ավանդականի դեմ արշավը երկու տարում ավելի մեծ չափերի է հասել, մարդիկ հստակ հայտարարել են, որ իրենք իզմեր չունեն: Մենք տեսանք, որ «քայլողների» բանակի շարքերում կան ոչ ավանդական արժեքների կրողներ, Առաքելական եկեղեցու ընդդիմախոսներ, և այդ նույն ժամանակահատվածում տեղի ունեցավ հարձակում Վեհափառի և Վեհարանի վրա»,- այսօր լրագրողների հետ հանդիպմանը նշեց Էդուարդ Շարմազանովը՝ անդրադառնալով կրթության մասին նոր չափորոշիչներին և դրանց շուրջ ստեղծված աղմուկին:

 

Ըստ նրա՝ այս ամենի գագաթնակետը եղավ այն, երբ ԱՄՆ նախագահի անվտանգության հարցերով նախկին խորհրդական Ջոն Բոլթոնն այցելեց Հայաստան և հայտարարեց, որ պետք է հրաժարվել ազգային կաղապարներից: Ինչին ի պատասխան՝ օրվա իշխանությունները որևէ առարկություն չարեցին:

 

 

«Հայագիտության դեմ արշավն ավելի տեսանելի դարձավ, երբ հրապարակվեց ազգային անվտանգության ռազմավարությունը: Եթե այն համեմատենք 2007 թվականի ազգային անվտանգության հետ, ապա երկու շատ կարևոր տարբերություն կտեսնենք: Նախ, 2007 ռազմավարության մեջ նշված է Արցախի Հանրապետություն, իսկ այս ռազմավարության մեջ բացակայում է Հանրապետությունը: 2007 թվականի Ռոբերտ Քոչարյանի ռազմավարության մեջ, որպես նպատակ, հստակ նշված է հայապահպանությունը, իսկ այս ռազմավարության մեջ այդ մասին որևէ բան չկա: Բնականաբար, այս ամենն իր արտացոլումը պետք է գտներ կրթության վերաբերյալ չափորոշիչների մեջ»,- հավելեց Էդուարդ Շարմազանովը:

 

Նա նաև շեշտեց, որ կրթության մասին նոր չափորոշիչների մեջ հայկական լեռնաշխարհը փոխարինվել է Արևելյան Անատոլիա անվանմամբ. «Եթե այսպես գնա, կարող է այս «քայլող» տիկնայք և պարոններն Արարատը վերանվանեն Ագրիդախ, ինչպես թուրքերն են ասում, Երևանն էլ՝ Էրիվան, և այդպես շարունակ»,- ընդգծեց ՀՀԿ գործադիր անդամը՝ շեշտելով, որ, բացի դրանից, նոր չափորոշիչներով «Պավլիկյան» և «Թոնդրակյան» շարժումները նշված չեն՝ որպես աղանդավորական շարժումներ, այլ նշված են՝ որպես պաշտոնական ուսմունքներ: Իսկ Բագրատունյաց թագավորության վերաբերյալ հիշտակվում է միայն Անի Բագրատունյաց ժամանակաշրջանի մասին: Չի հիշատակվում նաև Նժդեհի, Դրոյի, Անդրանիկի և այլոց մասին:

 

«Այս ամենից հետո էլ դեռ ասում են, ոչ բերված չափորոշիչները դեռևս վերջնական չեն, ինչո՞ւ պետք է նման չափորոշիչ նույնիսկ մեկի մտքով անցներ: Ինձ համար անընդունելի է, երբ շատ մասնագետներ շատ զգուշորեն են խոսում, որ հանկարծ պարոն վարչապետին չկպնեն՝սլաքներն ուղղելով միայն ԿԳՄՍ նախարարի դեմ: Ոչ, պարոնայք, սա պետական քաղաքականություն է, որը թելադրվում է նաև դրսից: Ժամանակն է՝ պետք է համախմբվել և հասկանալ, որ այս իշխանության մեկ օր ավելի գոյատևումը հարված է մեր ազգային արժեքներին»,- եզրափակեց Է.Շարմազանովը: