Լուրեր
Հայաստանը եւ Արեւելյան Գործընկերությունը (EaP). Համագործակցություն եւ հեռանկարներ
06.07.2020
![](http://www.hhk.am/files/n_pics/17826_s.jpg)
Հայաստանի Հանրապետական կուսակցությունը նոր կորոնավիրուսային համավարակի պայմաններում շարունակելով համագործակցությունը իր միջազգային գործընկերների հետ՝ կազմակերպել էր առցանց կրթական ծրագրեր, որոնց իրենց մասնակցությունն են ունեցել Հայաստանի Հանրապետական կուսակցության երիտասարդական կազմակերպության անդամները:
Դասընթացների նպատակն է եղել՝ երիտասարդ քաղաքական գործիչների մրցունակության բարձրացումը եւ նրանց ոչ ֆորմալ, քաղաքական կրթություն տրամադրումը: Կոնրադ Ադենաուեր հիմնադրամի ու Ռոբերտ Շուման ինստիտուտի հետ համատեղ կազմակերպված վեբինարների չորրորդ եզրափակիչ հանդիպման գլխավոր թեման է եղել Հայաստանը եւ Արեւելյան Գործընկերությունը:
Հայաստանի Հանրապետական կուսակցության փոխնախագահ Արմեն Աշոտյանի բանախոսությունը նվիրված է եղել աշխարհաքաղաքականությանը եւ վերջինիս մեջ Հայաստանի դերակատարությանը: ՀՀԿ փոխնախագահը անդրադարձել է նաեւ Հայաստանի ներքաղաքական իրավիճակին եւ Հայաստանում ընթացող հակաժողովրդավարական ու հակաիրավական գործընթացներին:
Ծրագրի ընթացքում բանախոսությամբ է հանդես եկել նաեւ Եվրոպական խորհրդարանի պատգամավոր, ԵվրաՆեսթ խորհրդարանական վեհաժողովի համանախագահ Անդրիուս Կուբիլիուսը, ով մասնակիցներին ներկայացրել է ԵՄ-ի (EU) հարաբերությունները Հայաստանի հետ Արեւելյան Գործընկերության համատեքստում: Անդրադարձ է կատարվել նաեւ Հայաստան-ԵՄ եւ ԵՄ-Վրաստան հարաբերությունների միջեւ եղած տարբերություններին:
Վրաստանի Արտաքին գործերի նախարարության Եվրոպական ինտեգրացիայի հարցերով խորհրդատու, դեսպան Լիլլա Մաքքեյը մասնակիցներին ներկայացրել է ԵՄ-ի հետ համագործակցության առավելությունները եւ Արեւելյան Գործընկերության հետ տասնմեկ տարվա համագործակցության արդյունքում ունեցած հաջողությունները:
Հայաստանի քաղաքական գիտությունների ասոցիացիայի գործադիր տնօրեն, ավագ գիտաշխատող Բենյամին Պողոսյանը խոսել է Արեւելյան Գործընկերության ընձեռած հնարավորությունների եւ Հայաստանի համար վիզայի ազատականացման ռեժիմի հեռանկարների մասին:
Հայաստանի Հանրապետական կուսակցության միջազգային գործընկերների, դասընթացներին հրավիրված բանախոսների եւ մասնակիցների խոսքով կազմակերպված վեբինարները շատ արդյունավետ եւ հաջողված էին:
Առցանց ռեժիմով իրականացվող դասընթացները միջազգային վերը նշված եւ այլ գործընկերների հետ լինելու են շարունակական:
ՀՀԿ երիտասարդական կազմակերպություն