Լուրեր
COVID-19-ը որևէ կերպ չի փոխի, առավել ևս չի վերացնի մինչև համաճարակն առկա միտումներն ու մոտեցումները. Կարեն Ավագյան
17.04.2020
Կարեն Ավագյանը ֆեյսբուքյան իր էջում գրել է.
«Փիլիսոփայությունն ու կանխատեսումները շատ են ապագա աշխարհի կամ աշխարհի ապագայի վերաբերյալ։ Յուրաքանչյուրն իր բանաձևումն ունի համավարակից հետո կառուցվող աշխարհի տեսլականի վերաբերյալ։
Շատ շատերը պնդում են, որ ոչինչ առաջվանը չի լինելու։
Իսկ… ի՞նչ, եթե…։
Հնարավոր է, որ այս համավարակի արդյունքում ստեղծված ճգնաժամը չդառնա համաշխարհային քաղաքականության և տնտեսության համար այն կարևոր սահմանային կետը, որի մասին շատերը խոսում են։
Ներկայիս ճգնաժամի նման դարակազմիկ իրադարձությունները ստեղծում են ու ամրապնդում սեփական միտումները։
Մենք անդադար փորձելու ենք համավարակի արդյունքում առաջացած ճգնաժամը դիտարկել, որպես նոր աշխարհի, տնտեսական նոր կառուցակարգերի սկիզբ, որին բոլորս այդքան սպասում ենք։
Նրանք, ովքեր ցանկանում եմ ամրապնդել պետության դերը, ովքեր ցանկանում են ընդլայնել հանրային բարիքների շրջանակը այս ընթացքում կգտնեն բազմաթիվ հիմնավորումներ, որ այս ճգնաժամը արդարացնում է վերջիներիս մտքերը։
Հնարավոր է լրիվ հակառակը, անձինք, ովքեր պետականության գաղափարի կողմնակից չեն և վիճարկում են վերջինիս գոյության անհրաժեշտությունը ևս կգտնեն իրենց համոզմունքների ապացույցը։
Կգտնվեն նաև նրանք, ովքեր կփորձեն հիմնավորել համաշխարհային կառավարման արդյունավետությունը և վերազգային առողջապահական համակարգի ունակությունը չեզոքացնել հետևանքները։
Հետևաբար, COVID-19-ը որևէ կերպ չի փոխի, առավել ևս չի վերացնի մինչև համաճարակն առկա միտումներն ու մոտեցումները։ Նեոլիբերալիզմը կշարունակի աստիճանաբար վերանալ։
Ավտորիտար պոպուլիստները ավելի ավտորիտար կդառնան։
Ազգային պետությունները կսկսեն վերադարձնել կորսված քաղաքական դիրքավորումները։
Իսկ, ազգային պետությունների ներսում կշարունակվի պայքարը պահպանողականների, բռնապետ պոպուլիստների և լիբերալների միջև»: