Լուրեր
«Մի զարմանա, քանի որ ապերախտը շուն չէ, այլ մարդ». Էդուարդ Շարմազանով
10.08.2019
ՀՀԿ խոսնակ Էդուարդ Շարմազանովը ֆեյսբուքյան իր էջում գրել է.
«Մի զարմանա, քանի որ ապերախտը շուն չէ, այլ մարդ
Մարդկությունը բոլոր ժամանակներում ունեցել է հոգևոր ճգնաժամեր: Եւ ամեն ճգնաժամի հետևում է հոգևոր արթնություն, որ ի վերուստ գալիս է մտածողների միջոցով:
Նրանք գործով եւ խոսքով կրթում են, բարձրացնում, իսկ առավել մեծերը՝ մարգարեանում բոլոր ժամանակների համար, քանի որ քննել ու որոշակիորեն ճանաչել են աստվածային արարչության դետալները, մարդու էությունը:
Գարեգին Նժդեհը այն բացառիկ կերպարներից է, որ միաժամանակ ազգային գործիչ է եւ մտավորական: Նա սովորեցնում է ոչ միայն սեփական օրինակով, այլ նաեւ մտածողությամբ:
Ընթերցեք եւ ասեք՝ որքանով է տարբերվում գրեթե մեկ դար առաջվա իրականությունը այսօրվանից:
«Չզարմանաս, եթե մի օր դասալիքը հերոսի դատավորը հանդիսանա: Մեր աշխարհում միշտ էլ վատասիրտը հայհոյել է աներկյուղ ասպետին, իսկ երկչոտը մութ անկյունից քար է նետել հերոսի վրա:
Մի զարմանա, քանի որ ապերախտը շուն չէ, այլ մարդ: Վայ նրանց, ովքեր չգնահատեցին սրանց սողունությունը եւ հազար վայ, եթե ժպտալու փոխարեն քաշես սրանց սանձը: Նման չարարվեստ էակներից շաղախված մի ցածրոգի ամբոխ սպանեց Սոկրատեսին եւ ավազակների հետ խաչ հանեց Նազովրեցուն:
Ես սովորեցի թքել թշնամացող ու նախանձող տգիտության վրա: Դու աշխատիր ավելի զորավոր լինել: Սովորիր ծիծաղել մարդկային վատությունների վրա եւ անցնել: Եւ իմացիր, որ հազարիցս լավ է պատմական մի գործ կատարել, թեկուզ հազար թշնամի շահելով, քան մարդկային չարությունից զերծ մնալու գնով դուրս մնալ պատմությունից:
Գարեգին Նժդեհ, «Ռազմիկ» , 1940թ.»: