Հայաստանի Հանրապետական կուսակցություն

Հունվարի 31-ին ՀՀԿ երիտասարդական կազմակերպության նախաձեռնությամբ Գարեգին Նժդեհի, Աշոտ Նավասարդյանի, Վազգեն Սարգսյանի, Անդրանիկ Մարգարյանի անվան կրթաթոշակներ են հանձնվել ռազմական կրթություն ստացող մի շարք ուսանողների։ ՀՀԿ երիտասարդական կազմակերպության նախագահ Կարեն Ավագյանի տեղեկացմամբ՝ այս ծրագիրն իրականացվում է 12 տարի անընդմեջ և նպատակ ունի խրախուսելու ռազմական կրթություն ստացող ուսանողներին։ «Կրթաթոշակի արժանացած ուսանողները մինչև իրենց ուսումնառության ավարտը ՀՀԿ երիտասարդական կազմակերպությունից ամսական լրացուցիչ 50 հազարական դրամ կրթաթոշակ կստանան։ Մենք այս ծրագիրը նախաձեռնել ենք գերազանց առաջադիմություն և օրինակելի վարք դրևորող ուսանողների համար, քանի որ կարծում ենք՝ այդ ուսանողները պետք է անպայման խրախուսվեն։ Մենք ամեն ինչ պետք է անենք, որ ռազմական կրթությունը դառնա գրավիչ։ Ռազմական մասնագիտությունը պատվաբեր է, և մենք էլ պետք է խրախուսենք այս դժվարին ուղին բռնած երիտասարդներին»,- ասաց Կարեն Ավագյանը։   
 

Նշենք, որ Գարեգին Նժդեհի անվանական կրթաթոշակ է ստացել Ա. Խանփերյանցի անվան ռազմական ավիացիոն համալսարանի 4-րդ կուրսի կուրսանտ Մանուկ Մուրադյանը,


Աշոտ Նավասարդյանի անվան կրթաթոշակի է արժանացել Հերացու անվան պետական բժշկական համալսարանի ռազմաբժշկական ֆակուլտետի ուսանող Արտաշես Աշոտի Գյոզալյանը,


Վազգեն Սարգսյանի անվան կրթաթոշակակիր է դարձել Վազգեն Սարգսյանի անվան ռազմական համալսարանի 4-րդ կուրսի կուրսանտ Արայիկ Թամրազյանը,


Անդրանիկ Մարգարյանի անվան կրթաթոշակ է հատկացվել Մոնթե Մելքոնյանի անվան ռազմամարզական վարժարանի 12-րդ դասարանի սան Դավիթ Անդրեասյանին։

Վազգեն Սարգսյանի անվան կրթաթոշակակիր Արայիկ Թամրազյանը Արցախից՝ Մարտունու շրջանից է, սովորում է Վ. Սարգսյանի անվան ռազմական համալսարանում, հրետանավոր է։ Արայիկը նշում է, որ կրթաթոշակն իրեն պարտավորեցնում է, այսուհետև մտածելու է էլ ավելի լավ սովորելու մասին։ «Եթե համալսարանն ինձ առաջադրել է կրթաթոշակի, նշանակում է, որ վստահում են, և ես ամեն ինչ անելու եմ այդ վստահությունը արդարացնելու համար»,- ասում է Արայիկը և ավելացնում, որ ուսումն ավարտելուց հետո որոշել է ծառայությունը շարունակել Արցախում՝ Ջրականում տեղակայված սահմանապահ զորամասում։ Նշենք, որ կրթաթոշակների հավաստագրերը ուսանողներին հանձնել են Աշոտ Նավասարդյանի այրին՝ Հասմիկ Նավասարդյանը, ՀՀԿ նախագահի տեղակալ Գալուստ Սահակյանը, ՀՀԿ կազմակերպչական հանձնաժողովի նախագահ Ռուբեն Թադևոսյանը, Երևանի քաղաքապետ Տարոն Մարգարյանը։