Լուրեր
Քաղաքապետ Տարոն Մարգարյանը հանդիպել է «Գրանթ Թորնթոն» ընկերության ներկայացուցիչների հետ
19.04.2017
Երևանի քաղաքապետ Տարոն Մարգարյանը հանդիպել է անկախ աուդիտորական, հարկային և խորհրդատվական ընկերությունների ցանկում աշխարհի առաջատար «Գրանթ Թորնթոն Ֆրանսիա»-ի գլխավոր գործադիր տնօրեն և «Գրանթ Թորնթոն Հայաստան»-ի հիմնադիր Դանիել Քուրքջյանի և ընկերության ներկայացուցիչների հետ:
Առանձնակի կարևորելով ընկերության միջազգային գործունեությունը՝ քաղաքապետ Տարոն Մարգարյանը նկատել է, որ իսկապես կարևոր է, երբ նման ընկերությունների հիմնադիրները հենց հայեր են, ովքեր այդպիսով կարողանում են իրենց որոշակի նպաստը բերել հայրենիքին: Ներկայացնելով քաղաքային տնտեսության կառավարման կատարելագործմանն ուղղված Երևանի քաղաքապետարանի ծրագրերը` քաղաքապետ Տարոն Մարգարյանը նշել է, որ քաղաքապետարանի կողմից առանձնակի կարևորվում է նաև մասնավոր հատվածի հետ համատեղ ծրագրերի իրականացումը` ընդգծելով, որ այս մասով առկա է նաև փոխշահավետ համագործակցության պատրաստակամությունը:
«Մենք անչափ կարևորում ենք ինչպես տեղական, այնպես էլ միջազգային տարբեր կառույցների հետ համագործակցության հաստատումն ու ընդլայնումը և շատ ուրախ կլինենք, որ ձեր ընկերությունը ևս իր մասնակցությունն ունենա Երևանում հնարավոր ներդրումների ներգրավման հարցում», - նշել է Տարոն Մարգարյանն ու հավելել, որ գործարար միջավայրի բարելավման և ներդրումների ներգրավման հետ կապված այսօր մայրաքաղաքում լուրջ քայլեր են ձեռնարկվում:
Շնորհակալություն հայտնելով ջերմ ընդունելության ու Երևանի զարգացման ծրագրերն անձամբ ներկայացնելու համար` «Գրանթ Թորնթոն Ֆրանսիա»-ի գլխավոր գործադիր տնօրեն և «Գրանթ Թորնթոն Հայաստան»-ի հիմնադիր Դանիել Քուրքջյանը կարևորել է Երևանի քաղաքապետի մոտեցումները քաղաքային տնտեսության կառավարման հարցում՝ նկատելով, որ դրա արդյունքները շատ որոշակի տեսանելի են այսօրվա Երևանում:
Հանդիպմանը ներկա «Գրանթ Թորնթոն Հայաստան»-ի տնօրեն Գագիկ Գյուլբուդաղյանն էլ Երևանի քաղաքապետին ներկայացնելով ընկերության գործունեությունն ու ծրագրերը, նշել է, որ այն անկախ աուդիտորական, հարկային և խորհրդատվական ընկերությունների ցանկում աշխարհի առաջատար կազմակերպություններից մեկն է և ներկայացված է տարբեր երկրներում:
«Պարոն քաղաքապետ, մեզ համար իսկապես անչափ կարևոր է ներդրում ունենալ Հայաստանի տնտեսության զարգացման գործում, և վստահեցնում եմ, որ մեր հերթին կանենք հնարավորը՝ Երևանի ներդրումային ծրագրերը տարբեր շրջանակներին ներկայացնելու և ներդրումներ ներգրավելու հարցում»,- նշել է Գագիկ Գյուլբուդաղյանը:
Հանդիպման ավարտին Երևանի քաղաքապետ Տարոն Մարգարյանը շնորհավորել է հյուրերին «Գրանթ Թորնթոն Հայաստան»-ի հիմնադրման 20-ամյակի առթիվ և մեկ անգամ ևս վստահեցրել, որ Երևանի քաղաքապետարանը բաց և պատրաստակամ է՝ իր լիազորությունների շրջանակում աջակցելու ընկերության տարբեր նախաձեռնություններին: