Հայաստանի Հանրապետական կուսակցություն

Մարտի 21-ին ՀՀ ԱԺ նախագահ Գալուստ Սահակյանն ընդունել է Ռուսաստանի Դաշնության Ա. Ս. Պուշկինի անվան ռուսաց լեզվի պետական ինստիտուտի ռեկտոր Մարգարիտա Ռուսեցկայային:

Ողջունելով տիկին Ռուսեցկայային ՀՀ Ազգային ժողովում՝ Գալուստ Սահակյանն ընդգծել է հայ-ռուսական դարավոր բարեկամության դերը միջմշակութային եւ կրթական համագործակցության բնագավառներում: ԱԺ նախագահը փաստել է. «Հզոր է այն պետությունը, որտեղ բարձր է կրթական մակարդակը, եւ ստեղծված են բոլոր պայմանները կրթության զարգացման համար»:

Անդրադառնալով մեր երկրում կրթական մակարդակի բարձրացմանն ուղղված քայլերին՝ Գալուստ Սահակյանը նշել է, որ ամեն տարի հայ շրջանավարտները հաջողությամբ ընդունվում են աշխարհի լավագույն տասնյակում գտնվող բուհեր, այդ թվում՝ Ռուսաստանի: Դա կրթական առաջընթացի վառ վկայությունն է:

Որպես Խ. Աբովյանի անվան հայկական պետական մանկավարժական համալսարանի խորհրդի նախագահ՝ ԱԺ նախագահը բարձր է գնահատել համալսարանի դերը մանկավարժական կադրերի պատրաստման գործում եւ կարծիք հայտնել, որ այն իրավամբ կարող է ճանաչվել տարածաշրջանում լավագույններից մեկը: Գալուստ Սահակյանը վստահություն է հայտնել, որ Խ. Աբովյանի անվան հայկական պետական մանկավարժական համալսարանի եւ Ա. Ս. Պուշկինի անվան ռուսաց լեզվի պետական ինստիտուտի միջեւ համագործակցությունը կկայանա՝ նպաստելով հայ մասնագետների կատարելագործմանը: ԱԺ նախագահը նշել է, որ կրթության բնագավառում տեղի ունեցող փոփոխությունները մշտապես իր ուշադրության կենտրոնում են, ինչպես նաեւ պատրաստակամություն է հայտնել աջակցելու կրթական ծրագրերի եւ նախաձեռնությունների իրականացմանը:

Մարգարիտա Ռուսեցկայան շնորհակալություն է հայտնել ընդունելության համար եւ ներկայացրել հիսունամյա պատմություն ունեցող ինստիտուտի գործունեությունը, հետագա ծրագրերը եւ Հայաստանի հետ կապված նախաձեռնությունները:

Տիկին Ռուսեցկայան կարեւորել է համագործակցությունը մանկավարժական համալսարանի հետ՝ ընդգծելով, որ շատ են անելիքները հայ մանկավարժների վերապատրաստման, ուսանողների եւ դասախոսների փոխանակման ծրագրերի հետ կապված: Մարգարիտա Ռուսեցկայան անդրադարձել է երկու տարի առաջ մեկնարկած «Ռուսաստանի դեսպաններ» ծրագրին, որը հաջողությամբ իրականացվել է նաեւ Հայաստանում եւ հույս հայտնել, որ այն կլինի շարունակական:

Ա. Ս. Պուշկինի անվան ռուսաց լեզվի պետական ինստիտուտի ռեկտորը նշել է, որ աշխարհի շուրջ 190 երկրներից, այդ թվում Հայաստանից ինստիտուտն ունի բազմաթիվ ուսանողներ, ովքեր սովորում են հեռակա ուսուցմամբ:

Տիկին Ռուսեցկայան նշել է, որ ինչպես միշտ, այսօր էլ Հայաստանում մեծ է հետաքրքրությունը ռուսաց լեզվի նկատմամբ եւ ժամանակն է ձեռնարկել որոշակի քայլեր՝ ռուսաց լեզվի մասնագետների համար կրթական կենտրոն բացելու ուղղությամբ, որպեսզի կրթական ծրագրերը, դասագրքերը եւ վերապատրաստվելու հնարավորությունն ավելի հասանելի լինի նաեւ հայ մասնագետներին: