Հայաստանի Հանրապետական կուսակցություն

ՀՀ ԱԺ նախագահ Գալուստ Սահակյանը նոյեմբերի 9-ին ընդունել է Հայաստանի Հանրապետությունում Քուվեյթի Պետության նորանշանակ դեսպան Նաուաֆ ալ Էնեզին:

Գալուստ Սահակյանը, ողջունելով հյուրին Հայաստանի խորհրդարանում, շնորհավորել է նրան պաշտոնն ստանձնելու կապակցությամբ եւ մաղթել հաջողություններ դիվանագիտական առաքելության իրականացման ընթացքում: Խորհրդարանի ղեկավարը հույս է հայտնել, որ դեսպանն իր պաշտոնավարման ընթացքում կանի հնարավորը երկու երկրների միջեւ առկա բարեկամական հարաբերությունները տարբեր ոլորտներում առավել զարգացնելու եւ խորացնելու համար:

Փոխշահավետ համագործակցության համատեքստում ԱԺ նախագահը կարեւորել է միջխորհրդարանական փոխգործակցության զարգացումը, բարեկամական խմբերի ակտիվ շփումները:

Գալուստ Սահակյանը պատրաստակամություն է հայտնել այսուհետ եւս աջակցելու երկու երկրների խորհրդարանների համատեղ ծրագրերի իրականացմանը:

Մեր երկրում Քուվեյթի Պետության դեսպան Նաուաֆ ալ Էնեզին, շնորհակալություն հայտնելով ջերմ ընդունելության համար, վստահեցրել է, որ իր աշխատանքով կնպաստի արդեն ձեւավորված երկկողմ համագործակցության առավել ընդլայնմանը: Նա նույնպես կարեւորել է միջխորհրդարանական համագործակցության խորացումն ու երկու երկրների բարեկամական խմբերի համագործակցությունը:

Դեսպանն ուրախությամբ նշել է, որ Քուվեյթի Պետությունում գտնվող հայ համայնքը մեծ դեր է ունեցել իրենց պետության զարգացման հարցում:

Հանդիպմանը քննարկվել են առաջիկայում համատեղ իրականացվելիք ծրագրերին վերաբերող հարցեր: