Հայաստանի Հանրապետական կուսակցություն

Հունիսի 24-28-ը Մոսկվա և Ռյազան քաղաքներում անցկացվեց Հայ-ռուսական երիտասարդական համաժողովը: Հայաստանի հանրապետական կուսակցության երիտասարդական կազմակերպությունը համաժողովին ներկայացել էր 5 անդամներով:

Համաժողովի նպատակն էր սերտացնել կապը հայ և ռուս երիտասարդների միջև և համագործակցության նոր ուղիներ մշակել:

Ծրագրի ընթացքում քննարկումներ եղան գլոբալ աշխարհի համատեքստում Հայաստանի և Ռուսաստանի դերի, Հայաստանի և Ռուսաստանի հոգևոր-մշակութային կապի և երիտասարդական քաղաքականության բնագավառում երկու երկրների համագործակցության ուղղությունների վերաբերյալ, ներկայացվեցին միջազգային տարածաշրջանային երիտասարդական ծրագրերի և 2017 թ.-ին կայանալիք Երիտասարդության և ուսանողության 19-րդ համաշխարհային փառատոնի նախագծերը:

Հաջորդիվ աշխատանքներ կատարվեցին 3 թեմատիկ խմբերում, որոնցից առաջինում քննարկումներ եղան տնտեսական համագործակցության հեռանկարների, ԵԱՏՄ շրջանակներում փոքր և միջին բիզնեսի ստեղծման և զարգացման վերաբերյալ: 2-րդ թեմատիկ խմբում աշխատանքները հիմնականում առնչվում էին հասարակական դիվանագիտության և երիտասարդական խորհրդարանականության զարգացմանն ու երիտասարդական հասարակական կազմակերպությունների և պետության միջև համագործակցության մեխանիզմներին: 3-րդ թեմատիկ խմբում անցկացված քննարկումները վերաբերում էին պատմամշակութային ժառանգության պահպանմանը և որպես երիտասարդական համագործակցության խորացման միջոցի` միջմշակութային հաղորդակցության զարգացմանը:

Համաժողովի շրջանակներում ՀՀԿ երիտասարդական կազմակերպության ներկայացուցիչ Ռուբեն Թովմասյանը ներկայացրեց ՀՀ Երիտասարդական խորհրդարանի ստեղծման պատմությունն ու գործունեությունը, որին հետևեց ռուսական կողմի առաջարկը <<Հայ-ռուսական երիտասարդական խորհրդարանական հանձնաժողով>> ստեղծելու մասին:

Համաժողովի ավարտին կատարվեց խմբային աշխատանքների արդյունքների ամփոփում և ընդունվեց բանաձև համագործակցության վերաբերյալ: