Լուրեր
Տարոն Մարգարյան. «Հնարավորին աջակցեք մեր այն համաքաղաքացիներին, ովքեր ինքնուրույն չեն կարողանա վերացնել քամու պատճառած վնասի հետևանքները»
24.05.2016
Երևանի քաղաքապետարանում կայացած աշխատանքային հերթական խորհրդակցության ժամանակ, որը վարել է քաղաքապետ Տարոն Մարգարյանը, զեկուցվել է, որ երեկ մայրաքաղաքում գրանցված ուժգին քամին զգալի վնասներ է պատճառել, այդ թվում նաև քաղաքային տնտեսության տարբեր ենթակառուցվածքներին:
Մասնավորապես զեկուցվել է, որ վնասվել է 106 շենք-շինությունների տանիք, արտաքին լուսավորության ցանցում գրանցվել է 63 վթար, այդ թվում ինչպես սյուների շրջվելու, այնպես էլ լուսատուների կոտրման և մալուխների վնասման: Արձանագրվել են նաև տասնյակ ծառերի, գովազդային վահանակների, ճանապարհային երթևեկության կարգավորիչ լուսացույցերի և ճանապարհային ուղեցույց-վահանակների տապալման դեպքեր:
Հաշվի առնելով քամու պատճառած վնասների ծավալը՝ քաղաքապետ Տարոն Մարգարյանը հանձնարարել է ստեղծել աշխատանքային խումբ, ուսումնասիրել և գույքագրել քամու պատճառով առաջացած խնդիրները ու համապատասխան քայլեր ձեռնարկել դրանց վերացման ուղղությամբ:
«Ակնհայտ է, որ պատճառված վնասը բավականին շոշափելի է, և քաղաքային ենթակառուցվածքներում արձանագրված վնասները վերացնելուն զուգահեռ, անհրաժեշտություն կա հնարավորին աջակցություն ցուցաբերել նաև մեր հատկապես այն համաքաղաքացիներին, ովքեր սոցիալական պայմաններից ելնելով ինքնուրույն չեն կարողանա վերացնել քամու պատճառած վնասի հետևանքները: Ըստ այդմ վարչական շրջանների համապատասխան ծառայությունները տեղերում առավել մանրակրկիտ պետք է ուսումնասիրեն խնդիրներն ու հնարավորին աջակցեն մեր այդ համաքաղաքացիներին», - ընդգծել է Տարոն Մարգարյանը:
Աշխատակազմի համապատասխան ծառայություններին էլ հանձնարարվել է, ըստ ոլորտների համագործակցելով պատկան կառույցների հետ, կարճ ժամանակում վերացնել քաղաքային ենթակառուցվածքներում գրանցված վթարների հետևանքներն ու վերականգնել դրանց բնականոն աշխատանքը: