Հայաստանի Հանրապետական կուսակցություն

Մարտի 29-31-ը Բազմակուսակցական ժողովրդավարության Նիդերլանդների ինստիտուտի(NIMD) նախաձեռնությամբ Թբիլիսիում անցկացվեց Հարավային Կովկասի և Ուկրաինայի երիտասարդ քաղաքական գործիչների 4-րդ համաժողովը, որին մասնակցում էին Հայաստանի, Վրաստանի, Ադրբեջանի և ՈՒկրաինայի խորհրդարաններում ընդգրկված կուսակցությունների երիտասարդ ներկայացուցիչները: ՀՀԿ Երիտասարդական կազմակերպությունը ծրագրին ներկայացել էր 4 անդամներով:
Համաժողովի նպատակն էր ներկայացնել տարածաշրջանում ժողովրդավարացման գործընթացի հետ կապված խնդիրները, մարտահրավերներն ու ձեռքբերումները և առաջարկել համագործակցության հնարավոր և արդյունավետ մոդելներ:
Ծրագրի ընթացքում տեղի ունեցավ 1 լիագումար նիստ, և քննարկումներ անցկացվեցին թեմատիկ 6 աշխատանքային խմբերում: Քննարկումները վերաբերում էին Հարավային Կովկասի և Ուկրաինայի ընտրական համակարգերին, քաղաքական կուսակցությունների ընտրարշավներին, որոշումների կայացման գործընթացում կանանց դերակատարմանը, ժողովրդավարական գործընթացներում մեդիայի դերին, այդ գործընթացների վրա սահմանադրական փոփոխությունների ազդեցությանն ու ՏԻՄ դերի բարձրացմանը: Թեմատիկ քննարկման ժամանակ ՀՀԿ ԵԿ անդամ Վարդուհի Սարգսյանի կողմից զեկույց ներկայացվեց սահմանադրական փոփոխությունների և ժողովրդավարության վրա դրանց ազդեցության մասին:
Համաժողովի փակման լիագումար նիստի ընթացքում <<Զարգացող ժողովրդավարական գործընթացները Հարավային Կովկասում և ՈՒկրաինայում>> խորագրով ամփոփիչ զեկույցով հանդես եկավ ՀՀԿ ԵԿ ներկայացուցիչ Հասմիկ Ղազարյանը, ով իր խոսքում անդրադարձ կատարեց վերջին տարիներին տարածաշրջանում, մասնավորապես Հայաստանում ժողովրդավարության ամրապնդման ուղղությամբ կատարված քայլերին` ընդգծելով ՀՀ վերջին ձեռքբերումը` կապված սահմանադրական բարեփոխումների հետ: Խոսելով հետագա անելիքների անհրաժեշտությունից` ՀՀԿ ԵԿ ներկայացուցիչը նշեց այն շոշափելի առաջընթացի մասին, որ գրանցվել է կոռուպցիայի դեմ պայքարում, ազատ և արդար ընտրությունների, ազատ տնտեսական մրցակցության ապահովման, պետական կառույցների գործունեության թափանցիկության բարձրացման, դատական համակարգի անկախության ապահովման և քաղաքացիական հասարակության զարգացման գործում:
Աշխատանքային խմբերում անցկացված քննարկումների ընթացքում, ինչպես նախորդ տարիներին, այս տարի ևս բազմաթիվ փաստարկներով ընգծվեցին Հայաստանի ակնհայտ առավելությունները ժողովրդավարացման գործում հետամնաց դիրքեր գրավող Ադրբեջանի նկատմամբ:

Հիշեցնենք, որ տարածաշրջանային 3-րդ համաժողովի ընթացքում ՀՀԿ ԵԿ կողմից ներկայացված Հարավային Կովկասի երկրների երիտասարդ քաղաքական գործիչների համար խորհրդարանի ստեղծման նախագիծը, որի շուրջ համախմբվել էին ՀՀ պառլամենտական բոլոր ուժերը, արժանացել է դրամաշնորհի և կգործի արդեն այս տարվանից: