Լուրեր
ԱԺ նախագահն ընդունել է Պյոտր Սվիտալսկուն
03.12.2015
ՀՀ ԱԺ նախագահ Գալուստ Սահակյանը դեկտեմբերի 3-ին ընդունել է ՀՀ-ում Եվրոպական միության պատվիրակության ղեկավար, դեսպան Պյոտր Սվիտալսկուն:
Ողջունելով նորանշանակ դեսպանին` Գալուստ Սահակյանը շնորհավորել է նրան նշանակման կապակցությամբ եւ մաղթել արդյունավետ աշխատանք` հույս հայտնելով, որ նա իր գործունեությամբ կնպաստի Հայաստան-ԵՄ հարաբերությունների առավել զարգացմանն ու խորացմանը:
Խոսելով Հայաստան-ԵՄ հարաբերությունների դինամիկ զարգացումից՝ խորհրդարանի ղեկավարն այդ հարցում կարեւորել է Հայաստանում ԵՄ պատվիրակության հետ արդյունավետ համագործակցությունը:
Գալուստ Սահակյանը նշել է, որ Եվրոպական միության հետ համապարփակ համագործակցության խորացման հարցում Հայաստանի հանձնառությունը հաստատուն է: Այս համատեքստում ԱԺ նախագահը կարեւորել է ԵՄ խորհրդի որոշումը՝ Հայաստանի հետ հարաբերությունների նոր իրավական հիմքի ձեւավորման շուրջ բանակցություններ սկսելու մանդատ տրամադրելու վերաբերյալ: ԱԺ նախագահը հույս է հայտնել, որ բանակցությունների արդյունքում մշակված Գործողությունների ծրագիրը կուրվագծի փոխադարձ հետաքրքրություն ներկայացնող համապարփակ փոխգործակցությունը:
Հանդիպման ընթացքում ԱԺ նախագահն անդրադարձել է նաեւ Հայաստանում ընթացող սահմանադրական բարեփոխումների գործընթացին:
Հայաստանում Եվրոպական միության պատվիրակության ղեկավար, դեսպան Պյոտր Սվիտալսկին, շնորհակալություն հայտնելով ընդունելության համար, նշել է, որ ՀՀ Ազգային ժողովը կարեւոր դերակատարություն ունի Հայաստան-ԵՄ հարաբերություններում:
Պյոտր Սվիտալսկին, խոսելով Հայաստանում ընթացող սահմանադրական բարեփոխումների մասին, այդ համատեքստում կարեւորել է Հայաստանի արդյունավետ համագործակցությունը Վենետիկի հանձնաժողովի հետ: Դեսպանն իր բազմաթիվ գործընկերներից տեղեկացել է, որ Հայաստան-Վենետիկի հանձնաժողով համագործակցությունը եղել է օրինակելի:
Դեսպանը գոհունակությամբ փաստել է, որ Հայաստանի իշխանություններնիր ղեկավարած կառույցի հետ համագործակցում են հրապարակային եւ պատրաստակամ են զարգացնելու համագործակցությունը: Դեսպանն ընդգծել է.«Հայաստանի իշխանությունների հասանելիությունն ու երկխոսության մակարդակն ավելի բարձր է, քան մի շարք եվրոպական երկրներում»:
Պյոտր Սվիտալսկին խոսել է նաեւ եվրոպական երկրներ մուտքի արտոնագրի տրամադրման դյուրացման գործընթացի մասին՝ մասնավորապես նշելով, որ այս գործընթացից հետո անհրաժեշտ է անցում կատարել առանց մուտքի արտոնագրի ռեժիմի:
Զրուցակիցները քննարկել են նաեւ երկկողմ հետաքրքրություն ներկայացնող հարցեր: