Հայաստանի Հանրապետական կուսակցություն

 Հայաստանի հանրապետական կուսակցության Երիտասարդական կազմակերպությունը մայիսի 14-16-ը Պորտուգալիայում ընթացող Եվրոպայի ժողովրդական կուսակցության (ԵԺԿ) Երիտասարդական կազմակերպության (YEPP) 10-րդ համագումարում ընտրվել է YEPP-ի անդամ։
ՀՀԿ Երիտասարդական կազմակերպության նախագահ Կարեն Ավագյանը տեղեկացնում է, որ, որպես կանոն, անդամության հարցերը YEPP-ում քննարկվում են գործադիր մարմնի նիստերում։ ՀՀԿ ԵԿ անդամակցումը, սակայն, քննարկվել և ընդունվել է համագումարում։ Ըստ պարոն Ավագյանի՝ սա իրենց կառույցի երեք տարվա հետևողական աշխատանքի արդյունք է։ Կարեն Ավագյանը YEPP 10-րդ համագումարում հանդես է եկել ելույթով, ներկայացրել ՀՀԿ երիտասարդական կառույցի գործունեությունը, համագործակցությունը միջազգային կառույցների հետ, պատասխանել է ներկաների հարցերին։ Առանձին հանդիպումներ են տեղի ունեցել բոլոր երկրների պատվիրակների հետ։ Ընդ որում, YEPP-ը ՀՀԿ Երիտասարդական կազմակերպության անդամակցությունը քննարկման դնելիս նախապես հարցումներ է արել և դրական կարծիքներ ստացել եվրոպական քաղաքական երիտասարդական այլ կառույցներից ևս։
Կարեն Ավագյանը նշում է, YEPP-ը եվրոպական ամենամեծ քաղաքական երիտասարդական կառույցն է, որը համախմբում է եվրոպական մոտ 40 երկրի 57 քաղաքական կուսակցությունների ավելի քան 1,6 միլիոն երիտասարդների։ ՀՀԿ ԵԿ-ն սերտորեն համագործակցում է բազմաթիվ եվրոպական քաղաքական կառույցների հետ, և սա ևս մեկ հարթակ է, որտեղ կբարձրացվի Հայաստանի ձայնը։
Նշենք նաև, որ YEPP-ի 10-րդ համագումարում տեղի են ունեցել նաև ղեկավար կազմի ընտրություններ։