Հայաստանի Հանրապետական կուսակցություն

Երևանի քաղաքապետարանում տեղի ունեցած աշխատանքային հերթական խորհրդակցության ժամանակ Երևանի քաղաքապետ Տարոն Մարգարյանին զեկուցվել է, որ մայրաքաղաքում շարունակվում են փողոցների, մայթերի և այգիների սանիտարական մաքրման աշխատանքները: Կոմունալ տնտեսության վարչության պետը զեկուցել է, որ այդ նպատակով քաղաքապետարանի ենթակայության բոլոր կառույցների մասնակցությամբ շաբաթ օրը կազմակերպվել են նաև լրացուցիչ սանմաքրման աշխատանքներ: Զեկուցվել է նաև, որ գույքագրվել են հանրային օգտագործման տարածքներում առկա աղբամաններն ու, ըստ անհրաժեշտության, տվյալ տարածքները համալրվել են նոր աղբամաններով: Քաղաքապետը հանձնարարել է նշված աշխատանքները պահել մշտական ուշադրության կենտրոնում և աղբամաններով կահավորել նաև երկրորդական, երրորդական փողոցները, ինչպես նաև համալրումներ կատարել զբոսայգիներում և բակային տարածքներում:

«Այս ուղղությամբ աշխատանքները պետք է լինեն մշտական հսկողության տակ և համալրումներն էլ, բնականաբար, պետք է արվեն առաջին իսկ անհրաժեշտության դեպքում, անմիջապես: Եվ ընդհանրապես, պետք չէ կարծել, որ եթե արդեն տեղադրել եք անհրաժեշտ աղբամանները, ապա այլևս ավարտել եք ձեր աշխատանքներն ու տվյալ հատվածում էլ անելիք չկա: Միշտ հիշեք, որ քաղաքային տնտեսության հետ կապված աշխատանքները երբեք չեն ավարտվում, դրանք շարունակական են: Ուստի հորդորում եմ բոլորիդ զերծ մնալ իրականացվող աշխատանքներն ամբողջությամբ ավարտված համարելու մտայնությունից և առաջնորդվել շարունակականության սկզբունքով, ինչն արդյունավետ աշխատանքի կազմակերպման ամենակարևոր պայմանն է»,-ընդգծել է Տարոն Մարգարյանը:

Սանիտարական ոչ պատշաճ վիճակում գտնվող հողատարածքները սեփականատերերի, վարձակալների ու կառուցապատողների կողմից պարտադիր մաքրման և բարեկարգման աշխատանքներին անդրադառնալով՝ զեկուցվել է, որ հաշվառված տարածքների մեծ մասն արդեն իսկ մաքրվել են: Զուգահեռ աշխատանքներ են տարվում նաև անբարեխիղճ որոշ սեփականատերերի հայտնաբերման ու նրանց տնօրինման տակ գտնվող տարածքները պատշաճ տեսքի բերելու ուղղությամբ:

«Այս ուղղությամբ տարվող աշխատանքները ևս պետք է լինեն մշտական խիստ հսկողության տակ: Մաքրության ապահովումն ու պահպանումը պահանջում է ամենօրյա հետևողական աշխատանք, այլ ոչ թե մեկանգամյա ինչ-որ գործողություն: Պետք չէ մոռանալ, որ այդ ամենը չի վրիպում ոչ մեր և ոչ էլ, առավել ևս, մեր համաքաղաքացիների աչքից: Ուստի այս հարցում եղեք ավելի կոշտ և հետևողական, փորձենք սեղմ ժամկետներում հայտնաբերել այն սեփականատերերին, որոնք խուսափում են պարտավորությունների կատարումից: Շատ դեպքերում երևանցիները կարող են նաև տեղեկացված չլինել, որ աղբանոցի վերածված այս կամ այն տարածքը ինչ-որ մեկի սեփականությունն է և արդարացիորեն դժգոհեն քաղաքային իշխանություններից: Ըստ այդմ, առաջնորդվեք բացառապես այն գիտակցումով, որ որևէ մեկը իրավունք չունի աղբանոցի վերածել մայրաքաղաքն ու մնալ անպատիժ: Գործեք օրենքի ողջ խստությամբ, ինչի իրավունքը ձեզ տրված է»,- հանձնարարել է քաղաքապետ Տարոն Մարգարյանը:

Հարակից ընդհանուր օգտագործման տարածքների պարտադիր բարեկարգման նորմերի պահպանման հետ կապված էլ զեկուցվել է, որ, չնայած տնտեսվարողները բազմիցս ծանուցվել են աշխատանքների իրականացման մասին, այնուամենայնիվ, դրանք կատարվում են մասամբ և ոչ լիարժեք: Քաղաքապետը հանձնարարել է ուժեղացնել գործընթացի նկատմամբ հսկողությունն ու ձեռնարկել օրենքով սահմանված համապատասխան քայլեր:

«Տարվող աշխատանքների արդյունքներն իրոք գոհացուցիչ չեն: Ծանուցումներից հետո հաջորդ քայլը պետք է լինի ավելի կոշտ և գործնական ու ենթադրի պատասխանատվություն: Աշխատելով օրենքի տառով՝ ձեռնարկեք համապատասխան միջոցներ և ապահովեք տեսանելի արդյունք», - ընդգծել է Տարոն Մարգարյանը:

Անդրադառնալով շինհրապարակների կազմակերպման պայմանների նկատմամբ իրականացվող ամենօրյա հսկողությանը՝ քաղաքաշինության և հողի վերահսկողության վարչության պետը զեկուցել է, որ նախորդ շաբաթվա ընթացքում իրականացված հսկողության արդյունքում հայտնաբերվել է իրավախախտման թվով 27 դեպք, որոնց մասով կազմվել են համապատախան վարչական արձանագրություններ: Քաղաքապետը հանձնարարել է շարունակել այս ուղղությամբ խիստ հսկողությունն ու պարբերաբար իրազեկել աշխատանքների ընթացքի մասին:

Բնապահպանության վարչության պետը, մայրաքաղաքում ընթացող կանաչապատման աշխատանքների հետ կապված, զեկուցել է, որ ջերմատնից ծաղկապատման տարածքներ է տեղափոխվել 225 հազար ծաղկասածիլ: Ծառերի բուժման նպատակով կրապատվել է արդեն 35 հազար ծառ: Ընթացքի մեջ են նաև խոտհնձի աշխատանքները: Ոռոգման ցանցերի գործարկման մասով էլ զեկուցվել է, որ 10 վարչական շրջաններում դրանք արդեն իսկ գործարկվել են, մյուս 2 վարչական շրջաներում կվերագործարկվեն մայիսի 15-ից:

Քաղաքապետ Տարոն Մարգարյանը պատասխանատուներին հանձնարարել է մայիսի 25-ից բոլոր վարչական շրջաններում մեկնարկել բակային տարածքների ասֆալտապատման աշխատանքները:
16-րդ թաղամասի շենքերի գազիֆիկացման աշխատանքների ընթացքի մասով քաղաքապետին զեկուցվել է, որ թվով 16 շենքեր ամբողջությամբ գազիֆիկացված են, ևս 2 շենքում աշխատանքներն ընթացքի մեջ են: Թաղամասի մյուս շենքերի վերաբերյալ զեկուցվել է, որ նախապատրաստական բոլոր աշխատանքներն ավարտված են, և շենքերը պատրաստ են գազիֆիկացման:

Բացօթյա ապօրինի առևտրի կանխարգելման ուղղությամբ տարվող աշխատանքների մասով առևտրի և սպասարկումների վարչության պետը զեկուցել է, որ կատարվում է ամենօրյա հսկողություն: Նախորդ շաբաթ արձանագրվել է 9 դեպք: Երևույթը բացառելու նպատակով քաղաքապետ Տարոն Մարգարյանը հանձնարարել է շարունակել գործընթացի նկատմամբ սահմանված հսկողությունը՝ հատուկ ուշադրություն դարձնելով հանգստյան օրերին ոչ սահմանված վայրերում կազմակերպվող առևտրի կանխարգելմանը:

Հանրակրթության վարչության պետը զեկուցել է, որ մայիսի 23-ին դպրոցների Վերջին զանգի միջոցառումները պաշտաճ կազմակերպելու նպատակով ձեռնարկվել են համապատասխան միջոցներ: Նշվել է նաև, որ դրամահավաքի հնարավոր դեպքերը բացառելու նպատակով գրավոր շրջաբերականներ են ուղարկվել բոլոր դպրոցների տնօրեններին, զուգահեռ կազմակերպվում են նաև հանդիպումներ ուսուցչական անձնակազմերի և ծնողների հետ: