Լուրեր
ՀՀԿ երիտասարդական կազմակերպությունը Հարավային Կովկասի քաղաքական գործիչների ֆորումում
29.04.2014
ՀՀԿ երիտասարդական կազմակերպության անդամները ապրիլի 26-27-ը Վրաստանի Քութաիսի քաղաքում՝ վրացական խորհրդարանում, երկրորդ անգամ մասնակցեցին Հարավային կովկասի երիտասարդ քաղաքական գործիչների ֆորումին։ Այն կազմակերպել էր Բազմակուսակցական ժողովրդավարության Նիդերլանդների ինստիտուտը։ Համաժողովին մասնակցում էին Հայաստանի, Վրաստանի և Ադրբեջանի քաղաքական կուսակցությունների ակտիվ երիտասարդները:
Երկօրյա համաժողովը բաղկացած էր երկու լիագումար նիստից և վեց աշխատանքային խմբերից, որոնց պետք է մասնակցեին քառասունհինգ երիտասարդ քաղաքական գործիչներ Հարավային Կովկասի երեք երկրների խորհրդարանական կուսակցություններից:
ՀՀԿ երիտասարդական կազմակերպության ներկայացուցիչները ելույթ ունեցան << Երիտասարդների դերը քաղաքականության մեջ>> և <<Կրթություն և նորարարություն>> թեմաներով: Նրանք ներկայացրեցին այն ձեռքբերումները, որ ունի Հայաստանի Հանրապետությունը կրթական բարեփոխումների, նոր մշակույթի, նոր տեխնոլոգիաների ներդրման, նորարարության բնագավառներում: Մասնավորապես անդրադարձ կատարվեց ՀՀ կառավարության գերակա ուղղություններից մեկին` կրթությանը: Նշվեց, որ ՀՀ սոցիալ-տնտեսական զարգացման հեռանկարային պահանջները, մտավոր ներուժի պահպանման և առավել արդյունավետ զարգացման խնդիրները խիստ անհրաժեշտ են դարձրել հանրապետության կրթական համակարգերի բազմակողմանի բարեփոխումների իրականացումը, որը կապահովի համակարգի համապատասխանությունը շուկայական տնտեսության պահանջներին և կնպաստի, որ պատրաստվող մասնագետների գիտելիքների մակարդակն ու որակավորոման աստիճանները համապատասխանեն համաշխարհային չափանիշներին:
Քննարկման թեմաներից էին նաև քաղաքական համակարգերը Հարավային Կովկասում, տնտեսության և բիզնեսի զարգացումը, Հարավային Կովկասի երկրների արտաքին քաղաքական առաջնայնությունները, մարդու իրավունքները և այլն:
Փակման խոսքի պատիվը տրված էր ՀՀԿ ԵԿ պատվիրակ Հայկ Մամիջանյանին, ով իր ելույքում անդրադարձավ որոշումների կայացման գործընթացներին երիտասարդության մասնակցության հարցին: Նա մանրամասն ներկայացրեց, թե ինչ ներդրում կարող են երիտասարդներն ունենալ քաղաքականության մեջ և ինչպես նրանք կարող են ավելի մեծ մասնակցություն ունենալ քաղաքական գործընթացներին:
Մասնակիցներին հատկապես զարմացրեց այն փաստը, որ ՀՀ երիտասարդ քաղաքական գործիչները այդքան մեծ ներգրավվածություն ունեն ՀՀ քաղաքական համակարգում և որոշումների կայացման գործընթացներում:
Համաժողովի փակման ամփոփիչ ելույթներում կազմակերպիչները հատուկ նշեցին ՀՀԿ պատվիրակի ներդրումը ծրագրի նախապատրաստական հանդիպմանը: