Լուրեր
ՀՀ ԱԺ նախագահ Հովիկ Աբրահամյանն ընդունեց Հայաստանում Թուրքմենստանի դեսպանին
13.02.2014
Փետրվարի 13-ին ՀՀ ԱԺ նախագահ Հովիկ Աբրահամյանն ընդունեց Հայաստանում Թուրքմենստանի նորանշանակ դեսպան Կուրբաննազար Նազարովին:
Շնորհավորելով դեսպանին նշանակման կապակցությամբ` Հովիկ Աբրահամյանը հույս հայտնեց, որ նրա գործունեությունը կնպաստի հայ-թուրքմենական հարաբերությունների հետագա ամրապնդմանն ու խորացմանը: ՀՀ Ազգային ժողովի նախագահը կարեւորեց երկու երկրների օրենսդիր մարմինների միջեւ հարաբերությունների զարգացումը` նշելով, որ պատրաստ է օժանդակել այդ կապերի ակտիվացմանը եւ պատգամավորական բարեկամության խմբերի համագործակցությանը:
Թուրքմենստանի դեսպան Կուրբաննազար Նազարովը վստահեցրեց, որ իր փորձը կօգտագործի հայ-թուրքմենական հարաբերությունների ամրապնդման եւ զարգացման համար: Միջպետական հարաբերությունների խորացման հարցում դեսպանը կարեւորեց միջխորհրդարանական կապերի ակտիվացումը եւ նշեց, որ Թուրքմենստանի նորընտիր խորհրդարանում արդեն ձեւավորվել է Հայաստանի հետ բարեկամության խումբ:
Երկուստեք կարեւորվեց առեւտրատնտեսական կապերի զարգացումը, փոխգործակցությունը միջազգային կառույցներում:
Հանդիպման ընթացքում քննարկվեցին նաեւ այլ հարցեր եւս: