Հայաստանի Հանրապետական կուսակցություն

 Գիրք նվիրելու օրվան ընդառաջ՝ ՀՀԿ Կենտրոն տարածքային երիտասարդական կազմակերպության նախաձեռնությամբ հավաքված շուրջ 350 գրքերն այսօր գտան իրենց տերերին: ՀՀԿ Կենտրոն տարածքային երիտասարդական կազմակերպության նախագահ Միքայել Սահակյանը և Երևանի քաղաքապետարանի աշխատակազմի ընտանիքի, կանանց և երեխաների իրավունքների պաշտպանության բաժնի պետ Իդա Խաչատրյանը, աշխատակիցների և երիտասարդների հետ գրքերը հանձնեցին Երևանի երեխաների խնամքի և պաշտպանության Քանաքեռ -Զեյթունի թիվ 1 և Նուբարաշենի թիվ 2 գիշերօթիկ հաստատությունների գրադարաններին: Երեխաների համար գրքերը ցանկալի նվեր էին, և ինչպես նշեցին աշխատակիցները, նրանք ունեին այդ գրքերի պահանջը: Երիտասարդների ջանքերով հավաքած գրքերը տարատեսակ էին՝ մանկական, գեղարվեստական գրականություն, հայ և համաշխարհային դասականների արժեքավոր գործեր, հին և նոր հրատարակություններ: Երիտասարդների նպատակը մեկն էր. երեխաներին հաղորդակից դարձնել ազգային և համամարդկային արժեքներին, որպեսզի նրանք հնարավորինս արդյունավետ օգտագործեն իրենց ժամանակը և դառնան կիրթ, բանիմաց քաղաքացիներ: