Հայաստանի Հանրապետական կուսակցություն

Հոկտեմբերի 23-ին խորհրդարանը շարունակեց աշխատանքը: Նիստը վարող ԱԺ նախագահ Հովիկ Աբրահամյանը հայտարարեց, որ «Ժառանգություն» խմբակցության ղեկավար է ընտրվել Զարուհի Փոստանջյանը, իսկ խմբակցության քարտուղար՝ Թեւան Պողոսյանը:

Խորհրդարանի ղեկավարը պատգամավորներին առաջարկեց ողջունել «Բաց դռներ» ծրագրի շրջանակում Ազգային ժողով այցելած եւ ԱԺ նիստի աշխատանքներին հետեւող Երեւանի Գրիգոր Զոհրապի անվան համար 43 դպրոցի մի խումբ ուսուցիչների եւ աշակերտների:

Այնուհետեւ խորհրդարանն առաջին ընթերցմամբ ընդունեց նախորդ օրը քննարկված «Զբաղվածության մասին» եւ «Վարչական իրավախախտումների վերաբերյալ ՀՀ օրենսգրքում լրացումներ կատարելու մասին» օրենքների նախագծերի փաթեթը:

Քվեարկության ավարտից հետո պատգամավորները շարունակեցին ՀՀ կառավարության աշխատակազմի ղեկավար-նախարար Վաչե Գաբրիելյանի ներկայացրած՝ «Պետական պաշտոններ զբաղեցնող անձանց վարձատրության մասին» եւ դրան կից օրինագծերի փաթեթի քննարկումը:

Գլխադասային՝ ԱԺ սոցիալական հարցերի մշտական հանձնաժողովի նախագահ Հակոբ Հակոբյանը նշեց, որ փաթեթը քննարկվել է հանձնաժողովում եւ ստացել դրական եզրակացություն: Հանձնաժողովի նախագահի կարծիքով՝ փաթեթի ընդունմամբ կլուծվի միասնական վճարման համակարգ ունենալու խնդիրը:

Հիմնական եւ հարակից զեկուցողները պատասխանեցին պատգամավորների հարցերին, որոնք վերաբերում էին պետական համակարգում տեխնիկական սպասարկում իրականացնող անձանց աշխատավարձերին, բարձր պաշտոն զբաղեցնող անձանց աշխատանքի ծանրաբեռնվածության չափի հաշվարկմանը, օրենսդիր, գործադիր եւ դատական մարմինների աշխատողների աշխատավարձերի դրույքաչափերի տարբերություններին, պատգամավորների գործունեության իրականացման համար նախատեսված ծախսերի փոխհատուցմանը, առաջադեմ երկրների՝ նույն ոլորտում իրականացված փորձի ուսումնասիրմանը:

Մտքերի փոխանակության ընթացքում ելույթ ունեցան ԱԺ պատգամավորներ Թեւան Պողոսյանը, Արծվիկ Մինասյանը, Խոսրով Հարությունյանը, Արտաշես Գեղամյանը եւ Արամ Մանուկյանը:

Թեւան Պողոսյանի կարծիքով՝ աշխատավարձերի բարձրացումը կնպաստի բարձրակարգ մասնագետների ներգրավմանը պետական համակարգ: Պատգամավորն առաջարկեց ոլորտում փոփոխություններ իրականացնելիս ուսումնասիրել նաեւ միջազգային փորձը: Ողջունելով եւ կարեւորելով կառավարության նախաձեռնությունը՝ Արծվիկ Մինասյանն առաջարկեց առաջինից երկրորդ ընթերցում ընկած ժամանակահատվածում ստեղծել աշխատանքային խումբ եւ քննարկել փաթեթի վերաբերյալ պատգամավորների ներկայացրած առաջարկները: Խոսրով Հարությունյանի կարծիքով՝ չնայած կառավարությունը կատարել է ծավալուն, եւ մեծ աշխատանք, սակայն կան բացթողումներ եւ որոշ հոդվածներ վերանայման կարիք ունեն: Պատգամավորը ողջունեց Արծվիկ Մինասյանի՝ աշխատանքային խումբ ստեղծելու առաջարկը: Ըստ Արտաշես Գեղամյանի՝ փաթեթի ընդունումը կնպաստի աղքատության կրճատմանը, արտագաղթի մեղմմանը:

Հարցի քննարկումը կշարունակվի հոկտեմբերի 24-ի ԱԺ նիստում:

Նիստում պատգամավոր Հովհաննես Մարգարյանը ներկայացրեց ՕԵԿ խմբակցության հարցապնդումը, որը վերաբերում էր արցախյան պատերազմի ազատամարտիկներին եւ Աֆղանստանի պատերազմի մասնակիցներին ԽՍՀՄ ավանդների փոխհատուցման գործընթացի ընթացքում արտոնություններ տրամադրելուն:

ՀՀ աշխատանքի եւ սոցիալական հարցերի նախարար Արտեմ Ասատրյանը, ներկայացնելով հարցապնդման վերաբերյալ կառավարության պատասխանը, նշեց, որ արցախյան պատերազմի ազատամարտիկների ավանդների փոխհատուցման վերաբերյալ ՀՀ 2014 թ. պետական բյուջեի նախագծով «ՎՏԲ-Հայաստան» ՓԲԸ-ում ավանդատու հանդիսացող քաղաքացիների՝ որպես նախկին ԽՍՀՄ Խնայբանկի ՀԽՍՀ հանրապետական բանկում մինչեւ 1993 թ. հունիսի 10-ը ներդրված դրամական ավանդների դիմաց փոխհատուցում» ծրագրի գծով նախատեսված է 1485.1 մլն դրամի ծախս (առանց վճարման ծառայության գումարի): Կառավարության պատասխանում նաեւ նշվում է, որ ԽՍՀՄ Խնայբանկի ՀԽՍՀ հանրապետական բանկի ավանդատու հանդիսացող Արցախյան կամ Աֆղանստանի պատերազմների մասնակիցների, ինչպես նաեւ նրանց ներդրած ավանդների չափի վերաբերյալ հաշվառում դեռեւս չի իրականացվել:

ԱԺ կանոնակարգի սահմանած կարգով` չորեքշաբթի օրվա վերջին նիստը տրամադրվեց պատգամավորների ու կառավարության անդամների միջեւ հարցուպատասխանին: