Հայաստանի Հանրապետական կուսակցություն

 Երևանի քաղաքապետարանի 2013 թվականի ծրագրով սահմանված ժամանակացույցի համաձայն շարունակվում են քաղաքապետարանի ենթակայության նախադպրոցական ուսումնական հաստատությունների նորոգման, հիմնանորոգման, ինչպես նաև մշակութային հաստատությունների ջեռուցման ապահովման ու վերանորոգման աշխատանքները:
Ծրագրի արդյունքում ջեռուցման համակարգերով կապահովվի մայրաքաղաքի 16 գրադարան: Դրանցից 12-ում աշխատանքներն արդեն ավարտվել են: Նշենք, որ ծրագիրն այս տարի ամբողջանում է, և մայրաքաղաքի բոլոր գրադարանները մինչև տարեվերջ ապահովված կլինեն ջեռուցման համակարգերով: Ջեռուցման համակարգերով են համալրվում նաև քաղաքապետարանի ենթակայության երաժշտական ու արվեստի դպրոցները, մշակույթի կենտրոնները:
Մշակութային օջախների ջեռուցման ծրագրում ընդգրկված են նաև <<Էրեբունի>> պատմահնագիտական արգելոց-թանգարանը, <<ՀայԱրտ>> մշակութային կենտրոնը և Կարեն Դեմիրճյանի անվան թանգարանը:
Ծրագրի շրջանակում թվով 28 մանկապարտեզներում ընթանում են հիմնանորոգման և մասնակի նորոգման աշխատանքներ, որոնց մեծ մասն արդեն իսկ ավարտված է:
Բոլոր աշխատանքների որակի ապահովման և ժամանակացույցի պահպանման նկատմամբ քաղաքապետի հանձնարարությամբ իրականացվում է խիստ վերահսկողություն: