Հայաստանի Հանրապետական կուսակցություն

Սիրելի հայրենակիցներ,

Ջերմորեն շնորհավորում եմ համապետական կարեւորագույն տոնի` Անկախության օրվա կապակցությամբ:

Բոլոր ժողովուրդների համար անկախությունը ոչ միայն բնական եւ օրինաչափ ձգտում է, այլեւ` սեփական ճակատագիրը տնօրինելու եւ իր ապագան կառուցելու իրավունք:

Անկախության ձեռքբերմամբ եւ պետականության վերականգնմամբ մենք ազդարարեցինք համայն աշխարհին, որ ի զորու ենք մեր երկիրը դարձնել համաշխարհային ընտանիքի արժանապատիվ անդամ, միջազգային գործընթացների իրավահավասար մասնակից:

22 տարի առաջ համաժողովրդական կամարտահայտմամբ նվաճած անկախությունը յուրաքնչյուրից պահանջում էր սրտացավ մոտեցում պետության հանդեպ, հանդուրժողականության ու միասնականության հատուկ դրսեւորում, հավատ ու վստահություն սեփական ուժերի նկատմամբ: Այդ նույն հավատն ու վստահությունը երաշխավորեցին մեր հաղթարշավը 1988 թվականի ավերիչ երկրաշարժի ծանր հետեւանքների վերացման, ռազմի դաշտում հանուն ազատ Արցախի տարած հաղթանակի ապահովման, սոցիալ-տնտեսական կյանքի բարելավման գործում:

Վստահ եմ, որ որեւէ փորձություն ու դժվարություն չեն կարող խաթարել մեր երկրի հաստատուն ընթացքը` հասնելու համաժողովրդական ձգտումների լիարժեք իրականացմանը, ունենալու ավելի զարգացած, բարեկեցիկ ու ապահով Հայաստան:

Եւս մեկ անգամ շնորհավորելով Անկախության տոնի առթիվ` բոլորիս մաղթում եմ եռանդուն եւ արգասաբեր աշխատանք հանուն մեր պետության հզորացման ու մեր ժողովրդի բարեկեցության: