Հայաստանի Հանրապետական կուսակցություն

ՀՀ Ազգային ժողովի գիտության, կրթության, մշակույթի եւ երիտասարդության հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում Արտակ Դավթյանի եւ Գագիկ Մինասյանի նախագահությամբ նոյեմբերի 2-ին շարունակվեցին «ՀՀ 2013 թ. պետական բյուջեի մասին» ՀՀ օրենքի նախագծի՝ կրթության, գիտության, սփյուռքի, մշակույթի, սպորտի, երիտասարդության եւ հարակից մի շարք ոլորտներին վերաբերող քննարկումները:

ՀՀ ֆինանսների փոխնախարար Պավել Սաֆարյանը ներկայացրեց 2013թ. նախատեսվող ֆինանսական հատկացումները նշված ոլորտներում: Մասնավորապես, նրա տեղեկացմամբ, ՀՀ սփյուռքի նախարարության կողմից իրականացվող ծրագրերի համար 2013 թվականի բյուջեով նախատեսված է 714 մլն դրամ, որը 5 մլն դրամով ավել է ընթացիկ տարում հատկացված միջոցներից:

Գիտության ոլորտին ուղղված ծախսերը 2013 թվականին կկազմեն շուրջ 11 մլրդ 241 մլն դրամ: Գիտատեխնիկական գործունեության համար նախատեսվել է շուրջ 11 մլրդ 156 մլն դրամ, որը 1 մլրդ 068.4 մլն դրամով ավել է նախորդ տարվա ցուցանիշից: Պետբյուջեով ոլորտին հատկացվող միջոցները բաշխվելու են հիմնականում հետեւյալ ուղղություններով՝ բազային ֆինանսավորում (8 մլրդ 106.9 մլն դրամ), պետական նպատակային-ծրագրային ֆինանսավորում (1 մլրդ 536.7 մլն դրամ), պայմանագրային (թեմատիկ) ֆինանսավորում (1 մլրդ 071.8 մլն դրամ): Առանձին ծրագրով նախատեսվել է նաեւ 441 մլն դրամ` գիտաշխատողների գիտական աստիճանների համար հավելավճարներ տրամադրելու նպատակով (ընթացիկ տարվա 420 մլն դրամի դիմաց):

Կրթության ոլորտի ծախսերը ՀՀ 2013 թ. պետական բյուջեով կազմում են 108 մլրդ 103.8 մլն դրամ: Ծախսերի աճն ընթացիկ տարվա պետբյուջեի համապատասխան ցուցանիշի նկատմամբ կազմում է 2 մլրդ 672.7 մլն դրամ կամ 2.5 տոկոս: Միջոցները հիմնականում կուղղվեն հանրակրթության ոլորտին, ներառական կրթությանը, հատուկ կրթությանն ու մասնագիտացված հանրակրթական ուսուցմանը, բարձրագույն կրթությանը, «Նախնական մասնագիտական կրթություն», «Միջին մասնագիտական կրթություն», «Արտադպրոցական դաստիարակություն» դասերին: Մանկավարժական անձնակազմի ամսական միջին հաշվարկային աշխատավարձը կկազմի 68.4 հազար դրամ, վարչական անձնակազմինը՝ 77 հազար: Ոլորտում շարունակվելու է իրականացվել Կրթության որակի եւ համապատասխանության երկրորդ վարկային ծրագիրը, որով նախատեսված աշխատանքների իրականացման նպատակով կհատկացվի 4 մլրդ 006.8 մլն դրամ:

Հանգստի, մշակույթի եւ կրոնի բնագավառներում հատկացումները կկազմեն 18 մլրդ 045.2 մլն դրամ` ՀՀ 2012 թվականի պետական բյուջեով նախատեսված 22 մլրդ 729.2 մլն դրամի դիմաց: Ծախսերի 4 մլրդ 684.0 մլն դրամով (20.6 տոկոսով) նվազումը հիմնականում պայմանավորված է ծրագրերի ավարտմամբ:

Թանգարանների եւ ցուցասրահների 1493 աշխատողների միջին ամսական հաշվարկային աշխատավարձը կկազմի 71967 դրամ (2012 թ. 58748 դրամի դիմաց), մշակույթի տների, ակումբների, կենտրոնների 34 աշխատողներինը? 67942 դրամ (2012 թ.` 55141 դրամի դիմաց), արվեստի բնագավառի 3565 աշխատողների միջին ամսական հաշվարկային աշխատավարձն էլ կլինի 65424 դրամ (2012 թ. 53670 դրամի դիմաց): Ռադիո եւ հեռուստահաղորդումների հեռարձակմանն ու հրատարակչական ծառայությունների իրականացման համար նախատեսված են 5 մլրդ 145.9 մլն դրամի չափով հատկացումներ:

Ոլորտներում իրականացվելիք ծրագրերի բովանդակային կողմերին անդրադարձան համապատասխան նախարարությունների ղեկավարները:

Ներկայացնելով մշակույթի բնագավառում 2013-ին սպասվող ծրագրային քաղաքականությունը՝ ՀՀ մշակույթի նախարար Հասմիկ Պողոսյանը որպես առաջնահերթություն նշեց այն ծրագրերը, որոնք նախատեսված են մշակութային ժառանգության ոլորտում՝ իր չորս բաղադրիչներով՝ գրադարաններ, թանգարաններ, ոչ նյութական մշակութային ժառանգություն, հուշարձաններ: Հաջորդ տարի իրականացվելիք նախաձեռնություններից նախարարը առանձնացրեց նաեւ հայկական գորգերի հանրահռչակման ծրագիրը, մշակութային արդյունաբերության զարգացման, երիտասարդ կադրերի պատրաստման խնդիրները: Պատգամավորները հարցերի միջոցով մանրամասներ ճշտեցին մշակույթի բնագավառի մի շարք հրատապ խնդիրների վերաբերյալ:

Կրթության եւ գիտության ոլորտների 2013 թ. ծրագրային քաղաքականությունը ներկայացրեց ՀՀ ԿԳ նախարար Արմեն Աշոտյանը: Անդրադառնալով գիտության ոլորտին ավելի շատ միջոցներ տրամադրելու պնդումներին՝ նախարարը կարծիք հայտնեց, որ ոլորտի հաջող գործունեությունը պայմանավորված է ոչ միայն ավելի շատ ֆինանսավորմամբ, այլեւ եղած ռեսուրսների ճիշտ օգտագործմամբ:

Խոսելով ՀՀ սփյուռքի նախարարության գալիք տարվա գործունեությունից՝ նախարար Հրանուշ Հակոբյանը նշեց, որ առաջնային է շարունակում մնալ հայրենիք-սփյուռք կապի ամրապնդումը, համատեղ ծրագրեր կյանքի կոչելը:

Սպորտի եւ երիտասարդության ոլորտների ծրագրերի բովանդակային կողմին անդրադարձավ ՀՀ սպորտի եւ երիտասարդության հարցերի նախարար Հրաչյա Ռոստոմյանը:

ՀՀ հեռուստատեսության եւ ռադիոյի ազգային հանձնաժողովի 2013 թ. նախատեսվող ծրագրային քաղաքականությունը ներկայացրեց ՀՌԱՀ նախագահի տեղակալ Ժիրայր Դադասյանը, ՀՀ հանրային հեռուստառադիոընկերության խորհրդի ծրագրերին անդրադարձավ խորհրդի նախագահ Ալեքսան Հարությունյանը:

Ազգային ժողովի գյուղատնտեսական եւ բնապահպանական, ֆինանսավարկային եւ բյուջետային հարցերի մշտական հանձնաժողովների համատեղ նիստում՝ Մարտուն Գրիգորյանի եւ Գագիկ Մինասյանի նախագահությամբ, նոյեմբերի 2-ին քննարկվեցին 2013 թ. պետական բյուջեի նախագծի հատկացումները գյուղատնտեսության, բնապահպանության եւ ջրային տնտեսության ոլորտներին: Ֆինանսավորման ծավալներն ու առաջնահերթությունները նախ ներկայացրեց ֆինանսների փոխնախարար Պավել Սաֆարյանը: Ծրագրերի եւ կատարվելիք աշխատանքների մասին խորհրդարանականներին մանրամասներ հաղորդեցին ոլորտների պատասխանատուները:

Գյուղատնտեսության նախարար Սերգո Կարապետյանը ներկայացրեց, որ 2013 թ. նախատեսվում է գյուղատնտեսության ոլորտին ուղղել 12 մլրդ 972 մլն դրամ: «Պետական աջակցություն գյուղատնտեսական հողօգտագործողներին» ծրագրով նախատեսվում է 550 մլն դրամ հատկացնել՝ փոքր ինչ պակաս ընթացիկ տարվա հատկացումից՝ պայմանավորված ձեռքբերվող սերմնացուի քանակի փոփոխությամբ: «Գյուղատնտեսական կենդանիների պատվաստում» ծրագրի արժեքը նախագծում 1 մլրդ 109 մլն դրամ է: Կենդանիների հիվանդությունների լաբորատոր ախտորոշման եւ հումքի ու նյութի փորձաքննության նպատակով կտրամադրվի 223 մլն դրամ: Գյուղատնտեսության ոլորտին տրամադրվող վարկերի տոկոսադրույքների սուբսիդավորման համար տարվա գլխավոր ֆինանսական փաստաթղթում առանձնացվել է 634 մլն դրամ՝ ավելի, քան այս տարի: Անտառի պահպանության ծառայություններին կուղղվի պետբուջեի միջոցներից 717 մլն դրամ: Ոլորտում, ի թիվս այլ ծրագրերի, նախատեսվում է իրականցնել նաեւ վարկային եւ դրամաշնորհային ծրագրեր:

Բնապահպանության ոլորտի ծախսերը, նախարար Արամ Հարությունյանի ներկայացմամբ, կկազմեն 12 մլրդ 805 մլն դրամ՝ ամբողջությամբ ընթացիկ ծախսեր: Այդ շրջանակներում կիրականացվեն մի շարք ծրագրեր: «Սեւանա լճի ջրածածկ անտառտնկարկների մաքրում»-ը կարժենա 125,4 մլն դրամ եւ կապահովի 122,5 հա ջրածածկ տարածքների մաքրում: Ձկան պաշարների համալրմանը կուղղվի 60 մլն դրամ, ջրային օբյեկտների եւ օդային ավազանի աղտոտվածության մոնիտորինգին՝ 113 մլն դրամ եւ այլն:

Ջրային տնտեսության ծախսերը գալիք տարում կկազմեն 34 մլրդ 249 մլն դրամ: Ջրային տնտեսության պետական կոմիտեի նախագահ Անդրանիկ Անդրեասյանը տեղեկացրեց, որ ծախսերը 5,9 մլրդ-ով գերազանցում են ընթացիկ տարվա համադրելի ցուցանիշը, եւ դա պայմանավորված է վարկային եւ դրամաշնորհային ծրագրերի ավելացմամբ: «Ոռոգում ջրառ իրականցնող կազմակերպություններին ֆինանսական աջակցության տրամադրում» ծրագրով կհատկացվի 433 մլն դրամ, ոռոգման ծառայություններ մատուցող ընկերություններին ֆինանսական աջակցությունը կկազմի մոտ 4 մլրդ դրամ: Ոլորտի պատասխանատուն տեղեկացրեց, որ ոռոգման ջրի սակագնի փոփոխություն գալիք տարում չի լինելու: Խմելու ջուր մատակարարող ծառայությունների սուբսիդավորումը 2013 թ. կլինի 1 մլրդ 97 մլն դրամ:

Կառավարության ներկայացուցիչները պատասխանեցին նաեւ պատգամավորների հարցերին: