Հայաստանի Հանրապետական կուսակցություն

 Նախագահ Սերժ Սարգսյանն այսօր աշխատանքային այցով մեկնել է Արագածոտնի և Շիրակի մարզեր:

Արագածոտնում Հանրապետության ղեկավարը ներկա է գտնվել «Գոլդեն Գրեյփ ԱրմԱս» ընկերության նորակառույց գինու-կոնյակի գործարանի բացման արարողությանը, որի հիմնարկեքին Նախագահը մասնակցել էր 2010թ. սեպտեմբերին: Սերժ Սարգսյանը շրջել է ժամանակակից չափանիշներին համապատասխան կառուցված գործարանի արտադրամասերում, ծանոթացել արտադրության պայմաններին և ընկերության զարգացման ծրագրերին:

Հանրապետության նախագահին ներկայացվել է, որ Արագածոտնի մարզի Կոշ համայնքի 200 և Սասունիկ համայնքի 20 հեկտար անմշակ տարածքների վրա «Գոլդեն Գրեյփ ԱրմԱս» ընկերությունն զգալի ներդրումներ է կատարել՝ տարածքը գյուղատնտեսական նշանակությամբ օգտագործելու նպատակով: Արդյունքում, այսօր ավելի քան 160 հա տարածության վրա հիմնված են խաղողի այգիներ, տնկվել է 400 հազար խաղողի տնկի, մշակվում են կոնյակի և գինու, ինչպես նաև սեղանի խաղողի սորտեր, իսկ 40 հա հողատարածքն զբաղեցնում են պտղատու այգիներ: Այժմ ընկերությունը խաղողի մշակումից անցնում է վերամշակման և սկսել է մթերման գործընթացը:

Պատասխանատուների հավաստմամբ, արդեն հաջորդ տարվա մայիսին գործարանը կներկայացնի իր առաջին արտադրանքը՝ “Shato ArmAs” անվանումով կարմիր, սպիտակ և վարդագույն գինիները, իսկ 3 տարի անց՝ նաև “ArmAs” անվամբ առաջին կոնյակը: Ըստ ընկերության ներկայացուցիչների, բարձրորակ հայկական հումքով և լավագույն որակական չափանիշներին համապատասխան տեխնոլոգիաներով ստացված արտադրանքը նախատեսվում է իրացնել ոչ միայն ներքին շուկայում, այլև արտերկրում:

«Գոլդեն Գրեյփ ԱրմԱս»-ի զարգացման ծրագրերի շրջանակում նախատեսվում է նաև տարածքում ստեղծել հյութերի, ջեմերի, մուրաբաների գործարան, ջերմոցներ, անասնաբուծական ֆերմա և ձկնաբուծարան: Դրանց շինարարական աշխատանքներն այժմ ընթացքի մեջ են:

Ընկերության կարևոր նախաձեռնություններից է նաև ագրոզբոսաշրջության զարգացմանն ուղղված ծրագրերի իրականացումը: Այդ նպատակով տարածքում կառուցվել է հյուրանոցային համալիր, որը շահագործման կհանձվի մյուս տարվա մայիսին: «Գոլդեն Գրեյփ ԱրմԱս»-ի ընթացիկ աշխատանքներին և հեռանկարային ծրագրերին ծանոթանալուց հետո, Նախագահը հաջողություն է մաղթել ընկերությանը՝ հետագա աշխատանքներում:

Արագածոտնի մարզից Նախագահ Սերժ Սարգսյանը մեկնել է Շիրակի մարզ: Հանրապետության ղեկավարը Գյումրիի «Մուշ-2» և «Անի» թաղամասերում ծանոթացել է «Աղետի գոտում անօթևան մնացած ընտանիքների բնակարանային խնդիրների լուծման նպատակով պետական աջակցությամբ իրականացվող բնակարանային ապահովման ծրագրի» 2-րդ փուլի շրջանակներում կատարված և ընթացիկ աշխատանքներին:

2008թ. սկիզբ առած՝ երկրաշարժի հետևանքով անօթևան մնացած ընտանիքների բնակարանային խնդիրների լուծմանն ուղղված շուրջ 85 մլրդ. դրամ արժողությամբ պետական աջակցության ծրագրի շրջանակներում շահառու ճանաչված 3714 ընտանիքների բնակարանային խնդիրները լուծվել են կառուցված բնակարանների/բնակելի տների հատկացմամբ և ֆինանսական աջակցության տրամադրմամբ:

Դրա հետ մեկտեղ, ներկայում շինարարության ընթացքում գտնվող 743 և լրացուցիչ սկսվող 608 բնակարանների/բնակելի տների շինարարական աշխատանքների ավարտման արդյունքներով իրենց լուծումը կստանան ևս 1351 ընտանիքների բնակարանային խնդիրները:

Շիրակի, Լոռու և Արագածոտնի մարզերի գյուղական բնակավայրերում 1-սենյականոց բնակելի տուն ստանալու համար սահմանված կարգով հաշվառված մոտ 400 ընտանիքների կտրամադրվի ֆինանսական աջակցություն: Արդյունքում, ծրագրի շրջանակներում կլուծվեն շահառու ճանաչված շուրջ 5500 ընտանիքների բնակարանային խնդիրները:

Աղետի գոտում պետական աջակցությամբ իրականացվող բնակարանաշինության ծրագրի 2-րդ փուլով Գյումրիի «Մուշ-2» և «Անի» թաղամասերում շինարարությունն սկսվել է 2010թ.: Թաղամասերը շահագործման են հանձնվում համապատասխան ենթակառուցվածքներով` ջրամատակարաման-ջրահեռացման, գազաֆիկացման, էլեկտրամատակարարման, փողոցային լուսավորության համակարգերով ու ասֆալտապատ ճանապարհներով, իսկ բնակարանները` ներքին հարդարմամբ և առաջին անհրաժեշտության որոշակի կահավորմամբ: Կառուցապատումն իրականացնում է «Գլենդել Հիլզ» ընկերությունը:

Սերժ Սարգսյանը ներկա է գտնվել նաև «Մուշ-2» թաղամասի նորակառույց դպրոցի բացման արարողությանը, շրջել դպրոցում, ծանոթացել կրթական այդ հաստատությունում իրականացված աշխատանքներին և պայմաններին:

Նախագահը նորակառույց «Մուշ-2» և «Անի» թաղամասերում շրջայցի ընթացքում այցելել է մի շարք բնակարաններ, շնորհավորել տոնական սեղանների շուրջ բնակարանամուտը նշող ընտանքիներին:

Սերժ Սարգսյանը նոր կառուցվող շենքերի շինհրապարակի մոտ ծանոթացել է թաղամասի գլխավոր հատակագծին: Հանրապետության ղեկավարին ներկայացվել են շենքերի նախագծերն ու զեկուցվել շինարարական աշխատանքների ընթացքը, այդ թվում՝ «Մուշ-2»-ի համալիր կառուցապատման նախագիծը: Քննարկման արդյունքում «Գլենդել Հիլզ» ընկերությունը պարտավորվածություն է ստանձնել իր միջոցներով «Մուշ-2» թաղամասում կառուցել մանկապարտեզ:

Շրջայցի ավարտին Նախագահը մի շարք հանձնարարականներ է տվել պատասխանատուներին: