Հայաստանի Հանրապետական կուսակցություն

ՀՀԿ նախընտրական քարոզարշավի վերջին հանդիպում-համերգը տեղի ունեցավ Հանրապետության Հրապարակում: Հանդիպումն ուղիղ կապով դիտում էին նաեւ Գյումրիու ընտրողները: Հանդիպման ընթացքում ելույթով հանդես եկավ ՀՀԿ առաջնորդ Սերժ Սարգսյանը:

«Բա՛րև Երևան,

այս պահին ուղիղ կապով մեզ դիտում են նաև Գյումրու հրապարակում,

Բա՛րև Գյումրի,

և վերջապես,

Բա՛րև Հայաստան:

Սիրելի՛ հայրենակիցներ,

Անցավ քարոզարշավի մեկ ամիսը: Մեկ ամսվա ընթացքում հարյուր հազարավոր մեր քաղաքացիների հետ կրկին դեմ առ դեմ հանդիպելու բախտավորությունն եմ ունեցել: Նայել եմ հարյուր հազարավոր աչքերի մեջ, կանգնել եմ հարյուր հազարավոր հոգսերի ու դարդերի առջև, հարյուր հազարավոր հույսերի ու նպատակների առջև, հարյուր հազարավոր հիասթափությունների ու ծածուկ հավատի առջև: Մեն-մենակ: Մեջքիս՝ Հանրապետականի ամրությունը: Մտքիս՝ ընկերներիս նվիրումը:

Եվ այսօր էլ պատրաստ եմ հարյուր հազար անգամ բարձրաձայն կրկնել՝ մենք փառահե՛ղ ժողովուրդ ենք, մենք ունենք հրաշալի՛ հայրենիք և մենք պիտի կերտենք նույնքան հրաշալի պետություն՝ հանուն նրա տիրոջ՝ Հայաստանի Հանրապետության քաղաքացու:

Հրաշալի բառեր են՝ Հայաստանի Հանրապետության քաղաքացի...

Բարեկամնե՛ր,

Այս ընտրարշավը, որն ահա մոտենում է իր տրամաբանական ավարտին, վկայում է, որ մենք անցյալում ենք թողնում օրերը, երբ քաղաքական մրցակցությունը բռնցքակռիվ էր, լավագույն դեպքում՝ ըմբշամարտ, իսկ իշխանության համար պայքարը, երբեմն՝ արյունահեղ ճակատամարտ: Օրերը, երբ քաղաքական ուժերը ոչ թե խնդրում էին ժողովրդի ձայնն ու նրան ծառայելու պարտականությունը, այլ մեծամտորեն պահանջում իշխելու իրավունքը:

Մենք կարողացանք քաղաքական պայքարը դարձնել մրցավազք, երբ ժողովրդի վստահության քվեին արժանանալու հավակնություն ունեցող յուրաքանչյուրը ոչ թե մարտնչում է հակառակորդի դեմ, երբեմն էլ հենց ժողովրդի դեմ, այլ փորձում է, սեփական արժանիքների վրա հենվելով, տեղ հասնել առաջինը: Տեղ հասնել՝ արժանապատվությունը չկորցնելով ու հասարակության վստահությունը նվաճած:

Մենք ցույց տվեցինք, որ ամուր ենք ոչ միայն մեր բանակի մարտունակությամբ ու մարտական ոգով, այլև մեր երկրի քաղաքական կառույցով ու մեր քաղաքացիական հասարակության եռանդով: Ամուր ենք մեր մեծերի խոհեմությամբ ու մեր երիտասարդների ավյունով: Ամուր ենք մեր փոխադարձ սիրո ուժով ու մեր արյան հիշողությամբ:

Սիրելի՛ հայրենակիցներ,

Այո՛, մեր ժողովրդի բարեկեցության, անվտանգության և հարատևության մասին պետք է հոգանք ինքներս: Ուրիշ ոչ ոք:

Այո՛, մենք ևս մրցում ենք, սակայն մրցում ենք ապրելով ու գործելով մե՛կ նավակում, որ մեր զավակների օրորոցն է:

Այո՛, մեր միջև մրցակցությունը այլոց հետ մեր հավաքական մրցունակության լավագույն գրավականն է:

Այո՛, մենք մրցում ենք քաղաքական դաշտում: Սակայն պետականության և համազգային գերակայությունները մրցակցությունից դուրս են: Դրանք մրցակցության կանոններն են, որոնք մենք սահմանում ենք և պիտի հարգենք ու պահպանենք ինքներս:

Ուրիշ ոչ ոք մեր փոխարեն չի պահպանելու մեր սահմանած կանոնները: Մեր քաղաքակրթության կանոնները: Փոխադարձ հարգանքի մեր սահմանները: Ինքնե՛րս պիտի անենք: Ուրիշ ոչ ոք մեզ դատավոր չէ: Ինքներս ենք մեր դատավորը, մեր սահմանների սահմանապահն ու մեր փոխադարձ հարգանքի մշտարթուն պահապանը:

Սիրելի՛ հայրենակիցներ,

Վաղը չէ մյուս օրը դուք կատարելու եք ձեր ընտրությունը: Կարևոր է յուրաքանչյուրիդ ձայնը: Եվ այդ ձայնը լսելի է լինելու:

Այս ընտրարշավը դառնալու է առանձնահատուկ իր քաղաքական պայքարի մշակույթով և հարաբերությունների որակով: Արդյունքում պիտի ասենք՝ մրցեցինք ու հաղթեցինք բոլորս: Հաղթեցինք ամեն գնով հաղթելու ձգտմանը ու հաղթեցինք ազգովին:

Տարիներ առաջ ես ձեզ խոստացել եմ, որ հարթելու ենք բոլոր այն անդունդները, որ մեր հասարակությունը բաժանել է մասերի: Խոստացել եմ, որ կազմալուծելու ենք այն պատնեշները, որոնց հետևում դիրքավորվել էր մեր հասարակությունը: Խոստացել եմ, որ հարթելու ենք այն ժամանակ անհաղթահարելի թվացող խոչընդոտները:

Այսօր հպարտությամբ ու մեր ժողովրդի՝ ձեր առջև շնորհակալության անսահման զգացումով ասում եմ՝ մենք հաղթե՛լ ենք: Հաղթել ենք ինքներս մեզ: Անցյալի կապանքները խորտակած ժողովուրդն անխորտակելի է:

Շնորհավորու՛մ եմ ձեզ և խոնարհվում ձեր իմաստության ու ձեր կամքի առջև:

Շնորհակա՛լ եմ, հարազատնե՛րս:

Կեցցե՛ Հայաստանի Հանրապետությունը:

Փա՛ռք Հայաստանի Հանրապետության քաղաքացուն»: