Հայաստանի Հանրապետական կուսակցություն

Շատ ավելի լավ է, որ հասարակության խնդիրները լուծվեն խորհրդարանում, քան փողոցում, քանի որ այնտեղ մտքերի բախումը կարող է ստանալ ավելի սուր և անցանկալի բնույթ, նման հայտարարությամբ լրագրողների հետ ճեպազրույցում հանդես եկավ ՀՀ Ազգային ժողովի նախագահ Սամվել Նիկոյանը` անդրադառնալով չորրորդ գումարման ԱԺ-ում իշխանության և խորհրդարանական ընդդիմության միջև համագործակցությանը:
«Խորհրդարանական ընդդիմության գործունեությունը ես նորմալ եմ գնահատում` անկախ նրանից, որ կարող է ինչ-որ ժամանակ ստիպված լինենք խոսափողով ձայն բարձրացնել կամ հանդիմանել: Դա խորհրդարանին հարիր աշխատաոճ է: Ուրիշ խորհրդարաններում այլ մոտեցումներ կան` բանը հասնում է ծեծկռտուքի, հայհոյանքների և այլն»,- ասաց օրենսդրի ղեկավարը:
Նիկոյանի ներկայացմամբ` եթե նույնիսկ խորհրդարանի դահլիճում լինում են որոշակի լարվածություն, որոշ տհաճ միջադեպեր, մեկ ժամ անց դրանք անմիջապես հարթվում են, պատգամավորներն իրար ձեռք են սեղմում և պահպանվում են նորմալ, մարդկային հարաբերությունները: «Երբեք քաղաքական հարաբերությունները չազդեցին մարդկային հարաբերությունների վրա. դա մեր խորհրդարանի ձեռքբերումներից է: Մեր խորհրդարանում շատ լավ պահպանվում են էթիկայի կանոնները»,- ասաց ԱԺ նախագահը:
Լրագրողների կողմից առաջարկություն հնչեց, որ պատգամավորների կոճակը դառնա մատնահետքերով, որպեսզի բացառվեն իրար փոխարեն քվեարկությունները: «Ես գիտեմ, որ այդպիսի պրակտիկա գոյություն ունի Թուրքիայում: Անկեղծ ասած ես այդ մոտեցումն ընդունում եմ»,- նշեց Սամվել Նիկոյանը:
Նրա խոսքով` այդ համակարգի ներդրումը կարող է պայմանավորված լինել որոշակի ֆինանսական խնդիրների հետ, սակայն դա նոր գումարման խորհրդարանի խնդիրն է: Անդրադառնալով պատգամավորների բացակայություններին` ԱԺ նախագահը նշեց, որ պատգամավորները բացի օրենսդրական գործունեությունից ունեն նաև այլ գործառույթներ, և միայն այդ գործառույթների իրականացման պարագայում կարելի է նրանց բացակայությունը արդարացված համարել:

armenpress.am