Լուրեր
ՀՀԿ նախընտրական ծրագրի քննարկումներն անցկացվել են մտավորականության հետ
16.03.2012
![](http://www.hhk.am/files/n_pics/470_s.jpg)
Հայաստանի Հանրապետության վարչապետ, Հանրապետական կուսակցության գործադիր մարմնի անդամ Տիգրան Սարգսյանի գլխավորությամբ ՀՀԿ նախընտրական ծրագրի մշակման շուրջ քննարկումներն անցկացվել են մտավորականության հետ: Մասնավորապես, քննարկումներին մասնակցողների թվում են եղել` Հայաստանի ժողովրդական արտիստ Ռաֆայել Քոթանջյանը, կոմպոզիտոր Մարտին Վարդազարյանը, Հանրային ռադիոյի էստրադային սիմֆոնիկ նվագախմբի գեղարվեստական ղեկավար, կոմպոզիտոր Երվանդ Երզնկյանը, Կամերային թատրոնի գեղարվեստական ղեկավար Արա Երնջակյանը, ճարտարապետ Լևոն Իգիթյանը, Թատրոնի և կինոյի պետական ինստիտուտի ռեկտոր Արմեն Մազմանյանը, Գրողների Միության նախագահ Լևոն Անանյանը, կինոռեժիսոր Միքայել Դովլաթյանը, մշակույթի և գիտության այլ անվանի ներկայացուցիչներ: Հիմնականում անդրադարձ է կատարվել կրթության և մշակութային բնագավառներում քաղաքականությանը և առաջիկա ծրագրերին:
ՀՀԿ-ն առաջնորդվելու է ազգի և անձի անվտանգության, ժողովրդավարական արժեքներին հավատարմության, հայրենասիրության, հայապահպանության, հավասար իրավունքների և հնարավորությունների, անձնական պատասխանատվության, ամուր ընտանիքի և համերաշխ համայնքի, մրցակցային միջավայրի և նվաճումներն արդարացի գնահատելու արժեքներով: «Մեր նպատակն է, որպեսզի այս արժեքները կենցաղում լինեն կիրառելի: Դրանցից շեղումը հասարակության համար պետք է լինի անընդունելի: Մենք քաջ գիտակցում ենք, որ այսօր ՀՀ-ում այս արժեքների և իրականության միջև առկա է ճեղքվածք: Մեր նպատակն այդ ճեղքվածքը լրացնելն է: Դա նշանակում է, որ փոփոխությունների միջոցով պետք է առաջ տանենք մեր քաղաքացուն»,- ասել է Տիգրան Սարգսյանը:
Վարչապետը նշել է, որ ՀՀԿ նախընտրական ծրագրում փոփոխություններ կատարելիս իրենք առաջնորդվում են քաղաքացիների համար արժանապատիվ ապրելու և արարելու հնարավորությունների ստեղծման գաղափարով: «Պետությունը քաղաքացույն իր տաղանդն իրացնելու համապատասխան միջավայր պետք է ստեղծի: Մեր ծրագրի բոլոր դրույթները ելնում են այս սկզբունքից»,- նշել է վարչապետը: Տիգրան Սարգսյանն ասել է, որ նախընտրական ծրագրում կարևորագույն խնդիրներից է լինելու մշակույթը և կրթությունը քաղաքացիներին հասանելի դարձնելը` անկախ նրանց ֆինանսական հնարավորություններից:
Նշելով, որ կրթության անհասանելիությունն անհավասարություն ծնող հիմնական պատճառն է` վարչապետն ասել է, որ այդ տեսակետից ՀՀԿ-ն առաջարկում է արմատական փոփոխություններ: «Պետությունն առաջին հերթին պետք է իրականացնի աղքատություն ծնող պատճառների վերացման քաղաքականություն: Եթե անապահով ընտանիքից երիտասարդն ընդունվում է բուհ, ապա ֆինանսների բացակայությունը չպետք է նրա համար լինի կրթություն չստանալու պատճառ: Պետությունն այդ ծախսերը վերցնելու է իր վրա»,- նշել է Տիգրան Սարգսյանը:
Վարչապետի խոսքով` աղքատություն ծնող մյուս պատճառն աշխատանքի բացակայությունն է: «Պետությունը պարտավոր է սոցիալապես անապահով ընտանիքների աշխատունակ անդամներին օգնել աշխատատեղ գտնելու գործում: Պետությունն իր միջոցների հաշվին անհրաժեշտության դեպքում պետք է վերապատրաստման հնարավորություններ ստեղծի, որպեսզի նրանք սեփական աշխատանքով կերտեն իրենց ապագան և բարեկեցությունը»,- ասել է կառավարության ղեկավարը:
Վարչապետը նշել է, որ նախընտրական ծրագրում դասագրքերի և ուսուցիչների որակի բարձրացումը լինելու է առաջնային խնդիր: «Կրթական համակարգում ներդնելով լավագույն չափանիշները` մենք պարտավոր ենք մտածել ազգային դաստիարակության և արժեքների պահպանության մասին: Կրթական դասընթացներում ազգային տարրը շեշտակիորեն պետք է ավելացվի»,- նշել է Տիգրան Սարգսյանը:
Անդրադառնալով մշակութային քաղաքականությանը` վարչապետը նշել է, որ այն հիմնված է լինելու քրիստոնեական արժեքների և մեր ժողովրդի հարուստ մշակութային ժառանգության վրա: «Հայ հոգևոր և մշակութային ժաառանգության պահպանումը լինելու է մշակութային քաղաքականության առանցքը: Պետական պատվերի ներդրմամբ, երաժշտության, հեռուսատահաղորումների, գրքերի միջոցով իրականացնելու ենք համամարդկային լավագույն օրինակներին համահունչ, ազգային ինքնությանը սպառնացող երևույթները կանխարգելելու մշակութային քաղաքականություն»,- ասել է Տիգրան Սարգսյանը: Վարչապետի խոսքով` մշակութային ոլորտում ներդրվելու են ժամանակակից բարձրակարգ տեխնոլոգիաներ` հայ ազգի հարուստ մշակութային ժառանգությունը միջազգային ասպարեզում ներկայացնելու նպատակով: ՀՀԿ նախընտըրական ծրագրում ներառվելու է նաև դպրոցներում ազգային երգի և պարի պարտադիր առարկաների ներդրումը, որն առաջարկվել էր մարզային քննարկումների ընթացքում:
Քննարկումների ընթացքում հնչել են բազմաթիվ առաջարկություններ, որոնք իրենց տեղը կգտնեն ՀՀԿ նախընտրական ծրագրում: