Հայաստանի Հանրապետական կուսակցություն

Ադրբեջանի լրագրողների ռազմական հետազոտությունների «Դոկտրինա» կենտրոնի տնօրեն Ջասուր Սումերենլին հայտարարել է, որ ադրբեջանական բանակի չզարգանալու հիմնական պատճառը բանակում առկա կոռուպցիան եւ հսկայական յուրացումներն են:
Նա ասել է, որ զինված ուժերի համար հատկացված հսկայական ֆինանսական միջոցների ծախսման կանոնները մութ են հասարակության համար, տենդերներն անցկացվում են փակ պայմաններում, կաշառակերության եւ կոռուպցիայի վերաբերյալ բազմաթիվ տեղեկություններ կան:
«Այդ բոլոր յուրացումների արդյունքում զինվորի սնվելու, հագնվելու մեջ լուրջ պակասություններ են ի հայտ եկել: Դրան գումարած էլ` զինված ուժերում ապօրինի դրամահավաքներ են կատարվում: Բանակում զինվորականների կարիերիայի հնարավորությունները սահմանափակվում են, սոցիալական անարադարություն է տիրում», -ասել է նա` նշելով, որ ամեն օր բանակից գանգատներ են ուղղվում իշխանության վերին ատյաններին, սակայն, այդպես էլ ոչինչ չի փոխվում:
«Ներքին եւ Սահմանային զորքերում կարգ ու կանոնը, զինվորների խնդիրները լուծելու պատրաստակամությունը փոքր-ինչ բարձր է, քան ազգային բանակում, ինչը գալիս է այդ կառույցների ղեկավարության` ավելի պատրաստվածությունից: Սակայն, նույնը չի կարելի ասել բանակի մասին: Հակառակը, մամուլում բազմաթիվ տեղեկություներ են հրապարակվել բանակում ծառայության վատ պայմանների, ոջիլի տարածված լինելու մասին: Բացի այդ, Պաշտպանության նախարարության ղեկավարությունն արդեն 20 տարի է չի փոխվել: Պաշտպանության նախարար Սաֆար Աբիեւը այդ պաշտոնում է արդեն 17 տարի, իսկ շտաբի պետ Նեջմեդդին Սադըգովը` 19 տարի: Աշխարհի ոչ մի երկրում, հատկապես` հետխորհրդային տարածքում նման երկար ժամկետով պաշտոնավարողներ չկան, ինչը զինված ուժերի զարգացմանը խոչընդոտող հիմնական պատճառներից մեկն է»,- կարծում է Սումերենլին:

armenpress.am