Հայաստանի Հանրապետական կուսակցություն

 Ազգային ժողովի «Պատիվ ունեմ» խմբակցության քարտուղար Տիգրան Աբրահամյանն ԱԺ «Քաղաքացիական պայմանագիր» խմբակցության պատգամավոր Անդրանիկ Քոչարյանին հերթական անգամ հիշեցնում է՝ երկրի պաշտպանունակության և մարտունակության մասին խոսելիս՝ առաջին հերթին պետք է շեշտը դնել երկրի ղեկավարի կողմից դա անելու քաղաքական կամքի, ապա նոր՝ սպառազինությունների գնման վրա։

«Երկրի պաշտպանություն ասվածը մի համակարգ է. նախ պետք է լինի երկիրը պաշտպանելու քաղաքական կամք, ապա սպառազինություն, որը կաշխատի մեր երկրի աշխարհագրության պարագայում, ապա՝ անձնակազմ, փոխարինող անձնակազմ, քաղաքական ճիշտ որոշումների կայացման ունակություն»,- ասաց Աբրահամյանը։

Վերջինս որպես օրինակ՝ մատնանշեց արցախյան 44-օրյա պատերազմում Փաշինյանի իշխանության կրած պարտությունն ու դրա պատճառերը՝ շեշտելով՝ դրանք կապված էին ոչ թե հնդկական հրետանու կամ ֆրանսիական բաստիոնի բացակայության, այլ առաջին հերթին և գլխավորապես՝ քաղաքական որոշումների բացակայության և կառավարման քաոսի հետ։

«44-օրյա պատերազմում մենք պարտվեցինք, որովհետև չկայի՞ն ֆրանսիական բաստիոններ, թե՞ պարտվեցինք, որովհետև չկային հնդկական հրետանիներ կամ ռադարներ։ Ո՛չ, այդ պատերազմում մենք պարտվել ենք առաջին հերթին քաղաքական որոշումների բացակայության պատճառով»,- ասաց Տիգրան Աբրահամյանը՝ ընդգծելով՝ ՀՀ այս իշխանությունն իր՝ որոշում կայացնելու անընդունակությունը դրել է մի կողմ և ամեն գնով փորձում է պարտությունների պատճառներն այլ տեղերում գտնել՝ որպես մխիթարություն ներկայացնելով զենքի գնումը։

«Հետևապես, ի՞նչ ունենք հիմա՝ այդ իշխանությո՞ւնն է փոխվել, դրա որա՞կն է փոխվել, ներուժն է փոխվել, իհարկե, ոչ, որևէ բան չի փոխվել։ Ուստի, այն, ինչ ներկայացնում են որպես բանակի մարտունակության բարձրացում, դա մեծամասամբ փուչիկ է, բլեֆ։ Առանձին ծրագրերի իրականացումն ամենևին էլ չի խոսում բանակի մարտունակության մասին»,- ասաց Աբրահամյանը։

Հարցազրույցի մանրամասները՝ տեսանյութում։

Աղավնի Սուքիասյան

168.am