ԵՐԵՎԱՆ, 18 հունվարի – Sputnik. Հայաստանի անվտանգային խնդիրների լուծումը Ռուսաստանի Դաշնության և Իրանի Իսլամական հանրապետության հետ երկարաժամկետ պայմանավորվածություններում է։ Նման տեսակետ Sputnik Արմենիայի հետ զրույցում հայտնեց ՀՀ պաշտպանության նախկին փոխնախարար Արտակը Զաքարյանը։
Նախկին փոխնախարարի դիտարկմամբ` այդ երկու երկրների հետ Հայաստանն ունի ընդհանուր շահեր և միայն նրանց հետ ճիշտ աշխատանքի արդյունքում կարող է դիմագրավել նոր աշխարհակարգի ստեղծման մարտահրավերներին։
Զաքարյանի խոսքով` ստեղծված իրավիճակում իր անվտանգության ապահովման համար Հայաստանը նախ պետք է անի իրենից կախվածը, իսկ դաշնակիցների հետ պետք է պատշաճ աշխատի, սեփական փաստարկներով հիմնավորված կերպով շահերը համադրի նրանց շահերի հետ։
«Միայն այդ կերպ է հնարավոր քո տարածաշրջանում, քո երկրում հասնել նվազագույն անվտանգային խնդրի լուծմանը։ Դա ՌԴ–ի և Իրանի հետ ամուր պայմանավորվածություններով կարող է լինել»,–ընդգծեց մեր զրուցակիցը։
Նման մարտահրավերների պայմաններում Հայաստանի համար առաջնային է սպառազինության ձեռքբերումը։ Բոլորին հայտնի է, որ Ռուսաստանը մշտապես եղել է Հայաստանի սպառազինության գլխավոր մատակարարը։ Բայց, Զաքարյանի խոսքով, ժամանակակից ռազմարվեստը, պատերազմի վարման կանոնները, պաշտպանունակության ապահովման խնդիրները թույլ են տալիս և պարտավորեցնում են դիվերսիֆիկացնել սպառազինության աղբյուրները։
«Որոշ դեպքերում անհրաժեշտ է այլ երկրներում փնտրել ռուսական տեխնիկայի անալոգներ, որոնք իրենց տակտիկանեխնիկական պարամետրերով առավել հարմար են լեռնային ռելիեֆի պայմանների և հայկական բանակի առջև ծառացած մարտական խնդիրների արդյունավետ լուծման համար, բայց դա միայն այն դեպքում, եթե դու վարում ես հավասարակշռված արտաքին քաղաքականություն և ինքնուրույն որոշումներ ես կայացնում»,–ասաց նա։
Վերոնշյալը, ըստ Զաքարյանի, Հայաստանի մասին չէ, քանի որ ներկայիս իշխանությունները հեռու են ինքնուրույն որոշումներ կայացնելուց։
Զաքարյանը, ամփոփելով հավելեց, որ սպառազինության գլխավոր աղբյուրը Հայաստանի համար եղել է և կմնա Ռուսաստանի Դաշնությունը` հաշվի առնելով տարածաշրջանում ընդհանուր հետաքրքրություններն ու շահերը։
armeniasputnik.am