Հարցազրույցներ
«Օրակարգում միայն մեկ խնդիր է՝ հեռացնել այս թրքահպատակ իշխանությանը,». Աննա Հովներ
10.06.2022
![](http://www.hhk.am/files/n_pics/22823_s.jpg)
ՀՀԿ մշակույթի հանձնաժողովի նախագահ, երգահան Աննա Հովներն այն կարծիքին է, որ իշխանությունները սակավամարդ ասելով՝ երևի իրենց աջակիցների կազմակերպած ակցիաները նկատի ունեն:
«Սակավամարդ է, օրինակ՝ իրենց Գնելի կազմակերպած կատակերգությունը, երբ Սասունցի Դավթի արձանի մոտ հավաքներ են կազմակերպում, որոնց մասնակցում է 50-100 մարդ, և դա անվանվում է սակավամարդ: Իսկ այն ակցիաները, որոնց հազարավոր մարդիկ են մասնակցում, ինչպե՞ս կարող են կոչվել սակավամարդ»,- 168TV-ի «Ռեվյու» հաղորդման ընթացքում ասաց նա:
Աննա Հովների դիտարկմամբ՝ ոստիկանական զորքերի կուտակումը Երևանում վկայում է այն մասին, որ իշխանությունները վախեցած են:
Անդրադառնալով շոու-բիզնեսի, մշակույթի գործիչներից շատերի պասիվությանը, նա հիշեցրեց, որ նախկինում բոլորը ակցիաներին ակտիվ էին, կենդանի պատ էին կազմում ոստիկանների և ցուցարարների միջև, ակտիվ էին. «Ի՞նչ ասեմ, երևի իրենց համար տրանսպորտի թանկացումը և 7 դրամով էլեկտրաէներգիայի թանկացումն ավելի կարևոր էր, քան այն, ինչ այսօր կատարվում է: Իսկ այսօր մենք կորցնում ենք մեր պետականությունը, և մեզ ուզում են դարձնել թուրքական վիլայեթ: Այսօր իրենց կարիքը կա, չէ՞ որ նախկինում նրանք իրենց հետևից մարդ էին բերում, և հավաքների մասնակիցների մեծ մասը հենց նրանց կոչով էր գնում: Այսօր էլ, եթե իրենք գան, բազմաթիվ մարդիկ, ովքեր դեռ չեն այցելել Ֆրանսիայի հրապարակ, հաստատ կգան, բայց թե ինչու չեն գալիս, սա արդեն, չգիտեմ…»:
Երգահանն այս ընթացքում համակարգում է Ֆրանսիայի հրապարակի մշակութային միջոցառումները, և նշեց, որ այս ընթացքում զանգահարել է բազմաթիվ երգիչ-երգչուհիների՝ հրավիրելով Ֆրանսիայի հրապարակում կազմակերպվող համերգներին ելույթ ունենալու:
«100 տոկոսից հրապարակ եկել է 20 տոկոսը, որովհետև 80 տոկոսը տարբեր պատճառներ են բերում կամ ասում են՝ քաղաքականությամբ չենք զբաղվում: Ես իրենց ասում եմ՝ բայց ձեզ որևէ մեկը չի ասում՝ եկեք՝ քաղաքականությամբ զբաղվեք, ասում ենք՝ եկեք երգեք: 2018թ. երբ փողոցներից չէին գնում կամ մասնակցում էին սրանց մշակութային ծրագրերին, եթե դա կարելի էր մշակույթ անվանել, իսկ հիմա փաստորեն ավտոմատ կերպով ժողովրդին կիսում են սևերի և սպիտակների: Այն մարդիկ, ովքեր նիկոլական են, իրենք սիրով երգում են այդ մարդկանց համար, իսկ Ֆրանսիայի հրապարակում հավաքվածները փաստորեն մարդ չե՞ն, դուք ձեր աշխատանքն եք կատարում և պարտավոր եք գալ և երգել յուրաքանչյուր մարդու համար: Դրա համար ես ուզում եմ շնորհակալություն հայտնել այն արտիստներին, ովքեր սիրով համաձայնում են, անկախ եղանակային պայմաններից և ամեն ինչից՝ գալիս ու երգում են հայ ժողովրդի համար, և հաստատ պատմությունը նրանց հիշելու է»,- ընդգծեց նա:
Հարցին՝ հնարավո՞ր է, որ շատերը սպասում են՝ հենց իշխանափոխություն լինի, նոր գան և բարձրանան հարթակ, նա պատասխանեց. «Ես համոզված եմ, որ այդպես էլ լինելու է: Բայց ժողովուրդն ամեն ինչ տեսնում է, և այն բոլոր մարդիկ, ովքեր այս ընթացքում եկել և ոգեշնչել են ժողովրդին, ժողովուրդը սա շատ բարձր է գնահատելու միշտ: Իսկ բոլոր նրանք, ովքեր մինչև այսօր չեն գալիս, վախենում են ֆեյքերից կամ մտածում են՝ իշխանափոխություն լինի՝ նոր գանք, իրենց խնդիրն է»:
Նա ընդգծեց, որ եթե այսօր ընդդիմությունը աթոռակռիվ տար, ապա արդեն վաղուց առաջնորդի անունը հայտնի կլիներ. «Բայց քանի որ այդ թեման նույնիսկ չի քննարկվում և օրակարգում միայն մեկ խնդիր է՝ հեռացնել այս թրքահպատակ իշխանությանը, բոլոր մարդիկ զբաղված են դրանով: Այստեղ գալիս են և՛ անկուսակցական մարդիկ, և՛ մարդիկ, ովքեր կորցրել են իրենց զավակներին պատերազմին, և վերադառնալով երգիչներին՝ ուզում եմ ասել, որ երբ դուք նշում եք, որ քաղաքականությամբ չեք զբաղվում, ժողովուրդ ջան, ուզում եք ասել, որ հրապարակում 50 հազարից ավելի մարդիկ բոլորը քաղաքական գործիչնե՞ր են: Մարդիկ պայքարում են, որովհետև չեն ուզում, որ վաղը թուրքը գա, և մենք թուրքական դրոշի տակ լինենք: Նույնիսկ երեխաներն են միանում պայքարին: Նրանք գալիս են ոչ թե, որ ծնողներն են ստիպում գալ, այլ այդ երեխաներն իրենք են ցանկանում գալ: Երբ մենք շաբաթ-կիրակի մշակութային միջոցառումներ ենք անցկացնում, դեպքեր կան, երբ ծնողներն իրենց բալիկին ասում են՝ այսօր շաբաթ է, քեզ ո՞ւր տանենք, երեխաները պատասխանում են, որ ուզում են Ֆրանսիայի հրապարակ գալ»:
Ինչ վերաբերում է ոստիկանների գործողություններին, նա նշեց, որ իրեն էլ են բերման ենթարկել, իր նկատմամբ էլ են ուժ կիրառել, բայց դա պայքարի դուրս եկածներին չի վախեցնում. «Շարժումը չի մարում, էլ ավելի մեծ թափ է հավաքում: Եթե շարժումը մարում է, ինչո՞ւ եք էլ ավելի շատ ոստիկաններ բերում: Մայիսի 1-ին այդքան ոստիկան չկար, բա ո՞նց է մարում շարժումը, եթե գնալով նրանք շատանում են, դուք հատուկ միջոցներ եք կիրառում: Չի եղել դեպք, որ ինչ-որ մեկին բերման ենթարկեն կամ մեկ ամսից ավելի պահեն, ու այդ մարդը դուրս գա պայքարից, ընդհակառակը՝ այդ մարդիկ ավելի ակտիվ են: Մի՞թե չեն հասկանում այս իշխանությունները, որ սրանով չեն վախեցնի: Կա մեկ խթան՝ հայկական Հայաստան, հայկական Արցախ, սրանից թանկ և կարևոր բան չկա: Այնպես որ, անիմաստ կատակերգություն է դա»:
Մանրամասները՝ 168TV-ի տեսանյութում
Ռազմիկ Մարտիրոսյան
168.am