Հայաստանի Հանրապետական կուսակցություն

 

«Եթե որոշ ժամանակ առաջ մարդիկ ուղղակի անվտանգություն բառն էին պատկերացնում, հիմա իրենց մաշկի վրա ամենօրյա ռեժիմով դա զգում են։ Այսինքն՝ այս պահին, ցավոք, շատ շրջաններ ունենք, որ սահմանամերձ են դարձել, և տեղի բնակիչները դա իրենց մաշկի վրա զգում են, իրենք առավոտյան արթնանում են և տեսնում, որ մի քանի 100 մետր այն կողմ ադրբեջանցի զինվորն է կանգնած, Ադրբեջանի դրոշն է դրված: Նորմալ է, որ մարդկանց անհանգստացնող առաջին բանն այն է, որ իշխանության գան ուժեր, որոնք առաջին հերթին կկարողանան անվտանգային հարցերը լուծել, հետո մնացած հարցերի մասին խոսել»,- նշեց նա:

 Լիլիթ Բեգլարյանի խոսքով՝ գործող իշխանություններին չեն մտահոգում անվտանգային խնդիրները. «Եթե դա նրանց մտահոգեր, չէինք ունենա այն աղետալի իրավիճակը, որն այսօր ունենք երկրում: Ինձ համար նորմալ չէ, որ այն ուժը, որը ստորագրել է կապիտուլյացիայի հայտարարություն, ոչ միայն չի հեռանում իշխանությունից, այլև գնում է ընտրությունների, գնում է քարոզարշավի և բղավում է մարդկանց վրա, վիրավորում է: Դեռ մի կողմ, որ քաղաքականությունը շատ ցածր մակարդակի է հասցրել, բայց աբսուրդ փաստն այն է, որ նա իրավունք ունի 44-օրյա պատերազմից հետո, որը երկիրը հասցրել է աղետի եզրին, գնա քարոզարշավի և խոսի այլ բաների մասին: Բնականաբար, Փաշինյանը չի կարող խոսել անվտանգությունից, որովհետև առաջին անվտանգություն խարխլողը հենց իրենք են»:

«Պատիվ ունեմ» դաշինքի պատգամավորի թեկնածուն ընդգծեց. «Ես չեմ պատրաստվում հիմա պոպուլիստական հայտարարություններ անել և ասել, որ ամեն ինչ լավ է լինելու: Մեր երկիրն իսկապես շատ վատ վիճակում է՝ կործանման եզրին է, եթե այսպես շարունակվի, մենք ընդհանրապես կարող ենք մոռանալ ինքնիշխան Հայաստանի մասին: Դրա համար այս պահին ոսկե սարեր խոստանալն իրատեսական չէ, և ընտրողը դա հասկանում է: Մենք ասում ենք, որ դժվար է լինելու, բայց մեր ներկայացրած ծրագիրը, մեր ներկայացրած թիմը՝ այդ հավաքականության մեջ, ունակ է երկիրը դուրս բերել այս ճգնաժամային վիճակից: Միայն դա կարող ենք խոստանալ, որ ամեն ինչ անելու ենք, որպեսզի երկիրն այս վիճակից դուրս բերենք: Ես չեմ կարող նշել մի ոլորտ, որը գտնվում է բարվոք վիճակում, այսինքն՝ բոլոր ոլորտներում մենք ունենք խնդիր, ոչ ոք չի կարող գալ և այդ 2018թ. կախարդական փայտիկով (որը, պարզվեց, իրականում գոյություն չունի) գալ և ասել՝ գիտե՞ք՝ մեկ ամսում կամ երկու ամսում այդ խնդիրները լուծվելու են, երկար տաժանակիր աշխատանք է սպասվում: Առաջին հերթին՝ պետք է բանակցողը փոխվի, որպեսզի մեզ հարգեն դրսում, որպեսզի մենք կարողանանք բանակցել և ևս մեկ բան հետ բերել՝ սկսած գերիներից՝ վերջացրած սահմանազատումներով»:

 

Ինչ վերաբերում է ականապատ քարտեզների դիմաց գերիների վերադարձին՝ նա նշեց, որ իշխող ուժը գերիներին օգտագործում է՝ ըստ նպատակահարմարության. «Եթե մենք չունենք պետություն, որը զբաղվում է գերիներով, բնականաբար, այլ պետությունները պետք է փորձեն այստեղ դիվիդենտներ հավաքել: Մենք, իհարկե, շատ շնորհակալ ենք թե՛ ԱՄՆ վարչակազմից, թե՛ Վրաստանի կառավարությանը, բայց այստեղ հարց է առաջանում, որ Հայաստանը սարքել են աշխարհաքաղաքական խաղերի թատերաբեմ, զրկել են ինքնիշխանությունից, Հայաստանը ոչինչ ինքնուրույն չի կարողանում անել և, բնականաբար, այլ ուժեր են խառնում, գալիս են այստեղ՝ մի փոքր հարց են լուծում և դիվիդենտ են հավաքում: Ինչո՞ւ Հայաստանը չի զբաղվում այդ հարցով, եթե նոյեմբերի 9-ի հայտարարության մեջ հստակ կետ կա այդ մասին, ինչո՞ւ Կարմիր խաչը չի զբաղվում: Ուրիշ բան ասեմ՝ պատերազմից հետո այդքան աղաղակում էին, որ պատերազմից անմիջապես հետո պետք է ՅՈւՆԵՍԿՕ-ի փաստահավաք առաքելություն գա այստեղ, որպեսզի հասկանա մեր մշակութային ժառանգության նմուշները, և այլն: Քանի՞ ամիս է անցել պատերազմից, մենք ինչի՞ն ենք սպասում, որ Ալիևը վերջին խաչը հանի վերջին եկեղեցո՞ւց, կամ վերջին հայատառ փորագրությունը մաքրի և նոր սկսենք զբաղվել այդ ամենո՞վ»:

 

Հայաստանի Հանրապետական կուսակցությանն իրենց աջակցությունն են հայտնել միջազգային այնպիսի խոշոր քաղաքական ընտանիքներ, ինչպիսիք են Կենտրոնամետ Դեմոկրատների Միջազգային Միությունը (CDI)-ը, Եվրոպական ժողովրդական կուսակցությունը: Անձամբ Լիլիթ Բեգլարյանի վերաբերյալ հայտարարություն է տարածել Եվրոպայի ժողովրդավարական երիտասարդական համայնքը, որի փոխնախագահն է «Պատիվ ունեմ» դաշինքի պատգամավորի թեկնածուն: Վերջինիցս հետաքրքրվեցինք՝ ինչո՞վ է պայմանավորված միջազգային նման աջակցությունը՝ Հանրապետական կուսակցությանը:

 

«Այս ամենը մեկ օրվա աշխատանքի արդյունք չէ, այս բոլոր հայտարարությունները ՀՀԿ տարիների շարունակական աշխատանքն է՝ մեր գործընկերների հետ: ԵԺԿ-ն Եվրոպառլամենտի ամենամեծ կուսակցությունն է, և մենք այս տարիների ընթացքում, թե՛ երբ իշխանության էինք, թե՛ 2018թ. հետո շարունակել ենք աշխատել իրենց հետ: Նույնը՝ CDI-ի մասով, որը համաշխարհային քաղաքական ընտանիք է, DEMYC-ը՝ երիտասարդական մակարդակով: Այսինքն՝ մենք այդ կառույցների հետ պարբերաբար աշխատել ենք, պարբերաբար մեր երկրի գործը մեր ուսերին ենք վերցրել և արել ենք: Այդ մարդիկ տեսել են մեր աշխատանքը և ի սատարումն՝ թե՛ հաջողություն են մեզ մաղթել, թե՛ իրենց աջակցությունն են հայտնել: Զարմանալի չէ, որ այս 3 տարվա ընթացքում գործող իշխանություններին որևէ աջակցություն, որևէ սատարում չեղավ որևէ երկրի կողմից: Գիտե՞ք՝ սելֆիները լավ են, գունավոր գուլպաներ հագնելը լավ է, բայց երբ չկա քաղաքական տեքստ, աջակցություն, բովանդակություն, այդ ամենը արդեն զրոյանում է: Միջազգային կառույցները, քաղաքական ընտանիքները ո՞ւմ վստահեն՝ մի ուժի, որ ոչինչ չի անում և միայն պոպուլիստական հայտարարություննե՞ր է անում, թե՞ մի ուժի, որը աշխարհաքաղաքական տարբեր բևեռներում ունի հավատարիմ գործընկերներ, որոնց հետ պարբերաբար աշխատում է»,- ի պատասխան՝ ասաց Լիլիթ Բեգլարյանը: