Հայաստանի Հանրապետական կուսակցություն

 

«Այլապես դուրս է եկել, որ որոշ մարդիկ մեր ազգաբնակչության վրա ազդելու համար ապատեղեկատվություն են տարածել, դրա վառ ապացույցներից մեկն ապրիլյան պատերազմի հետ կապված այն հայտարարություններն են, որոնք կան: Ձևավորվել է ապրիլյան պատերազմի քննիչ հանձնաժողով, որը դրանց վերաբերյալ էլ պետք է տա իր եզրակացությունը։ Խնդիրն այստեղ այն է, որ մեր հայրենակիցները, որոնք քաղաքական տարբեր հայացքների տեր են, մոռացել են, որ իրենց խոսքը լսում են նաև ՀՀ-ից դուրս, և այդկերպ կարծես թե հակառակորդի ջրաղացին են ջուր լցրել, ուստի ևս մեկ անգամ կարևոր է, որ բոլոր հարցերի պատասխանները տրվեն»,- ասաց Հովհաննես Սահակյանը՝ շեշտելով, որ սպասվելիք ասուլիսը ևս մեկ անգամ բացահայտելու է այս իշխանության խոստում տալու և դա չկատարելու բնավորությունը։

 Ինչ վերաբերում է գործող իշխանության տված խոստումներին, ապա Հովհաննես Սահակյանը հիշեցրեց վարչապետ Նիկոլ Փաշինյանի տվածները՝ մասնավորապես, տեսախցիկներից, կարմիր գծերից հրաժարվելու, Մարտի մեկի գործն ամբողջությամբ բացահայտելու և այլնի մասին, ու նշեց.

«Այս բոլոր խոստումների հետ կապված հասարակական ընկալումը մի փոքր փոխվել է։ Օրինակ՝ Մարտի 1-ի բացահայտում ասելն ինձ համար 10 զոհերի սպանությունների բացահայտումն է, բայց դա տեղի չի ունեցել։ Որպես իրավաբան՝ կարող եմ ասել, որ անհնար է գրեթե հստակ դրանց գնահատական տալ։ Իշխանությունը բացահայտման մասին հայտարարություններ էր անում այդ թեմաները հասարակության մոտ տաք պահելու համար, իսկ ժողովուրդը դրանցով կկերակրվի այնքան ժամանակ, որքան ինքը թույլ կտա և կցանկանա։ Նույնը վերաբերում է նաև Ռոբերտ Քոչարյանի միլիարդների մասին խոսակցություններին»: Հովհաննես Սահակյանը նշեց, որ քաղաքացիներն իրենք պետք է որոշեն և այլևս թույլ չտան իրենց կերակել անկատար մնացած խոստումներով, որովհետև դրանք ասվել են պարզապես ասվելու համար։

 

Դիտարկմանը, որ գործող իշխանությանը խոստումները չկատարելու, հեղափոխություն չանելու համար մեղադրում է նաև նրան երբեմնի սատարող ու աջակից համարվող «Սասնա ծռեր» կուսակցությունը, մասնավորապես՝ կուսակցության անդամ Վարուժան Ավետիսյանը հայտնում է, որ հեղափոխություն տեղի չի ունեցել, և ժողովուրդը խաբվել է, Հովհաննես Սահակյանը նշեց.

 

««Սասա ծռերը» խումբ են, որոնք ահաբեկչություն են կատարել, ինչի հետևանքով զոհվել է 3 սպա։ Ես իրենց պետք է խորհուրդ տամ՝ այդպես վստահ չասեն, թե շարունակելու են ազգային-ազատագրական պայքարը, որովհետև էլ նախկին թավիշը չկա, իրենց ապագայի և կյանքի մասին թող մտածեն. թող մի քիչ զգույշ լինեն, թավիշի ժամանակներն անցել են, թող իրենց կյանքն ապահովեն»: Նա նշեց, որ չի պատկերացնում որևէ այլ երկիր, որտեղ կարող էր նման մասշտաբի ահաբեկչություն կատարվել, և իշխանությունը որևէ ուժային գործողություն չիրականացներ, իսկ իրեն նման կերպ պահեց 2016 թվականին կառավարող ուժը։