Հայաստանի Հանրապետական կուսակցություն

 

«Կարծում եմ՝ բանակը կարողացավ իրեն զերծ պահել քաղաքական շահարկումներից, իսկ բանակի մարտունակությունը և խնդիրները լուծելու կարողությունը  կապված է նաև նրա հետ, որ թավշյա և սիրող հեղափոխության «չարժեքները», անլուրջ լայքերը, քայլարածների քաղաքականությունն այնտեղ մուտք չեն գործել։ Հաղթանակը տոնել են մարդիկ, որոնք այնտեղ են եղել երկար տարիներ. օրինակ՝ Շտաբի պետ Օնիկ Գասպարյան. նա երկար տարիներ ծառայել է բանակում, նույնը կասեմ նաև Գրիգորի Խաչատուրովի դեպքում։ Բանակում Նոր Հայաստանի կադրեր չկան, և արդյունքում՝ մեր Զինված ուժերը փայլուն կատարեցին իրենց առաջ դրած խնդիրները։ Սրան զուգահեռ՝ սակայն, քաղաքական իշխանությունը չկարողացավ դիվանագիտական ոլորտում արձանագրել առաջընթաց և փորձեց դիվիդենտներ շահել բանակի հաղթանակներից»,- ասաց Շարմազանովը՝ կրկնելով, որ բանակի գեներալիտետի շրջանում չկան քայլողներ, և հաղթանակը ոչ թե քաղաքական իշխանության, այլ պետության հաղթանակն է։

 Անդրադառնալով Անվտանգության խորհրդի քարտուղար Արմեն Գրիգորյանի՝ օրերս հրապարակված հոդվածին, որտեղ Գրիգորյանը հնչեցնում է հետևյալ հարցը՝ «Իսկ ինչո՞ւ հուլիսյան գործողությունները նույն ընթացքը չունեցան, ինչ նախկինում։ Նախ՝ հեղափոխությունը հիմնարար ձևով փոխել է Հայաստանի կառավարման համակարգի կարողությունները։ Հեղափոխությունից հետո շեշտակիորեն բարձրացել են Ադրբեջանը խորությամբ հետազոտելու մեր կարողությունները, և ժամանակին կանխատեսվել են վերջինիս գործողությունները», Էդուարդ Շարմազանովն ասաց.

«Այս գնահատականները հարիր չեն Անվտանգության խորհրդի քարտուղարին. ինչն են խորությամբ ուսումնասիրել, ինչ է, այդ խորության արդյունքո՞ւմ են  պարզել, որ Ալիևը կիրթ է և կառուցողական։ Ինչ վերաբերում է 2016 թվականի տարված համեմատությանը, ապա այդ համեմատությունն անհեթեթ է, որովհետև ռազմական գործողությունները 2016 թվականին եղել են ղարաբաղաադրբեջանական սահմանի ամբողջ երկայնքով։ Տավուշի դեպքերն իրենց մասշտաբներով կարելի է համեմատել, թերևս, միայն 2012 թվականի մարտական գործողությունների հետ, երբ մեր բանակը դարձյալ  փայլուն կատարեց իր առաջ դրված խնդիրը։ 2016 թվականի հետ կապված էլ՝ Անդրանիկ Քոչարյանի ղեկավարած Քննիչ հանձնաժողովը նշել է, որ մենք հաղթանակ ենք տոնել, և բոլոր գյուլնազտատական հեքիաթները, թե բահերով են կռվել, փամփուշտ չի եղել, վառելիք և սնունդ չի եղել, հերքվել են՝ համարվել լկտի սուտ։ Այս իշխանությունը պետական նկարագիր չունի։ Նրանք կանգ չեն առնում անգամ ազգային և պետական հաղթանակների վրա ստվեր գցելիս, իսկ սա շատ վտանգավոր բան է։ Եկեք հստակ նշենք՝ ի՞նչ է՝ Օնիկ Գասպարյանը, Գրիգորի Խաչատուրովը, Դավիթ Տոնոյանը 2016 թվականին ուրիշ էին, հիմա՝ ուրի՞շ, ի՞նչ է, ելակո՞վ են բարեփոխում բանակը, ելակով բանակի մարտունակությո՞ւն են բարձրացնում։ Մի հարց տամ՝այդ ո՞ւմ կնքած պայմանագրերով են բերել այդ զենքերը, իհարկե՝ մեր ժամանակ կնքած պայմանագրերով. 2017 թվականի հոկտեմբերին Ազգային ժողովի կողմից ընդունված պայմանագրի շնորհիվ է, որ  Հայաստանին հնարավորություն է տրվել ռուսական ներքին գործարանային գներով գնել ռուսական զենք»: Շարմազանովը նշեց, որ օրվա իշխանությունն այնքան ապիկար է, որ ոչ միայն նոր ձեռքբերում չի կարողացել արձանագրել, այլ նաև չի կարողացել բանակի հաղթանակները կապիտալիզացնել դիվանագիտական դաշտում։

 

«Այս իշխանությունը չկարողացավ գոնե մեկ միջազգային կառույցից ստանալ մի հայտարարություն, որտեղ Արցախի ինքնորոշման իրավունքին հղում արված լիներ,  չկար որևէ հայտարարություն, որտեղ հղում կլիներ հիմնարար սկզբունքներին։ Ընդամենը մեկ հայտարարություն է եղել, որտեղ ԵԺԿ-ն հղում է արել հիմնարար  սկզբունքներին ու ինքնորոշման իրավունքին, իսկ այդ հայտարարությանը հասել է ՀՀԿ-ն, հետևաբար՝ ի՞նչ եք գլուխ գովում, եթե չեք կարողանում ձեր Ազգային ժողովով, դիվանագիտական կորպուսով, Անվտանգության խորհրդով և այլ կառույցներով մեկ հայտարարություն ստանալ, ու դա ձեր փոխարեն անում է դարձյալ ընդդիմադիր ՀՀԿ-ն, ինչ իրավունքով եք խոսում առաջընթացից։ Կամ՝ ի՞նչ է նշանակում, երբ Ադրբեջանը խոսում է Հայաստանի նկատմամբ ագրեսիայի մասին ու գործուն քայլեր անում, իմ պետության վարչապետը Մինսկում ասում է, թե  ՀՀ-ն պատրաստ չէ միակողմանի զիջումների, մինչդեռ Նիկոլ Փաշինյանը Մինսկում պետք է ասեր ընդամենը  երկու բան՝ Ադրբեջանն ագրեսոր է, և վերջ,  Արցախի անկախությունն այլընտրանք  չունի, և վերջ։ Կամ  դա  գերագույն հրամանատարի պահվա՞ծք է՝ կառավարության նիստի ժամանակ ասում է՝ կարող է՝ մոլորվել են, Դուք Դավիթ Տոնոյանի դեպքի արտահայտությունը տեսա՞ք. Տոնոյանը, աբշիրնի ինֆարկտ չէ, բայց փոքր ինֆարկտ տարավ, դա տալո՞ւ հարց էր բա։ Իրեն առողջություն եմ մաղթում»,- ասաց Շարմազանովը։