Հայաստանի Հանրապետական կուսակցություն

Հարցազրույց ՀՀԿ կենտրոնական շտաբի պետ Հովիկ Աբրահամյանի հետ

Այսօր քարոզարշավն ավարտվում է, ինչպե՞ս կգնահատեք այն:
Քարոզարշավի ընթացքը գնահատում եմ միանգամայն նորմալ, այն ընթացավ քաղաքական պայքարին բնորոշ բոլոր էլեմենտներով:
Պարոն Աբրահամյան, այս ընթացքում, ձեր գործունեությունը այնքան էլ հրապարակային չէր: Ինչո՞վ է դա պայմանավորված:
Դա իմ ոճը չէ, անել ինչ-որ բան, որ ինձ տեսնեն: Ինձ համար կարևորը գործի արդյունքն է, ոչ թե երևալ կամ չերևալը: Այդ հիվանդությամբ այլոք են տառապում: Մեր կատարած աշխատանքի արդյունքը կերևա մայիսի 7-ին:
Ամփոփելով այս ընթացքում բազմաթիվ հրապարակումներում հնչած կարծիքները, տեսակետները և փոխադարձ մեղադրանքները. հնարավոր համարո՞ւմ եք Ժառանգություն-ՀՀԿ կամ ՀԱԿ-ԲՀԿ կոալիցիան:
Թեև քաղաքականության մեջ ոչինչ բացառել չի կարելի, սակայն առկա քաղաքական իրավիճակը իմ գնահատմամբ նման զարգացումների հիմքեր չի տալիս: /դա որոշ քաղաքական ուժերի ցանկությունն էր, որն, ավաղ, իրականություն չի դառնա/ Ինչ վերաբերում է ձեր մատնանշած տարաբնույթ տենդենցները ասպարեզ նետելուն, ապա պարզ է, որ գոյություն ունի ընդդիմադիր ընտրազանգված և որոշ քաղաքական ուժեր փորձում են այդ զանգվածը տանել իրենց կողմ մյուս ուժերին իրականությանը չհամապատասխանող մեղադրանքներ ներկայացնելով: Մենք այս առումով բացառություն չենք, տարբեր երկրներում ընտրական գործընթացներում նման տեխնոլոգիաներ հաճախ են կիրառվում:
Համամի՞տ եք, այն մտքին , որ այս ընտրություններում հիմնական խաղացողները կամ պայքարողները լինելու են ՀՀԿ-ն և ԲՀԿ-ն:
Ակնհայտ է, որ հիմնական պայքարը ընթանալու է առաջին տեղի և երկրորդ տեղի հավակնորդների միջև: ՀՀԿ-ն պայքարում է, որ պահպանի իր առաջին տեղը, ԲՀԿ-ն պայքարում է, որ պահպանի իր երկրորդ տեղը:
Ո՞ր քաղաքական ուժն է ըստ Ձեզ հավակնում ստանձնել քաղաքական պայքարի առաջատարի դերը:
Քաղաքական գործընթացներին քիչ թե շատ հետևող քաղաքացու համար ակնհայտ է, որ առաջատարը Հայաստանի Հանրապետական կուսակցությունն է:
Քաղաքական ո՞ր ուժերին եք տեսնում ապագա խորհրդարանում
Այն ուժերին, որոնք կհաղթահարեն օրենքով նախատեսված նվազագույն շեմը, այսինքն կունենան ժողովրդի վստահության բավարար չափաբաժին:
Ինչ եք կարծում որքա՞ն կլինեն ՀՀԿ-ի քվեները:
Վստահ եմ մեզ կհաջողվի ստանալ մեծամասնություն, բայց առավել կարևոր է, որ մենք անցկացնենք նոր որակի ընտրություններ:
Պարոն Աբրահամյան, չեք ափսոսում, որ ընտրություններից հինգ ամիս առաջ հրաժարվեցիք ԱԺ նախագահի պաշտոնից:
Սա առաջին անգամը չէ, երբ ես ղեկավարում եմ նախընտրական շտաբ: Լավ պատկերացնելով աշխատանքի ծավալը և պատասխանատվությունը` ես գիտակցված որոշում կայացրեցի հրաժարվել ԱԺ նախագահի պաշտոնից և իմ որոշումը ակնհայտ ճիշտ էր ապագայի համար:
Հնարավո՞ր է նորից զբաղեցնեք ԱԺ նախագահի պաշտոնը:
Չեմ բացառում ոչինչ: Դա կախված է ընտրության արդյունքներից և կուսակցության որոշումից:
ՀՀԿ-ի կարգախոսի տեսանկյունից ինչին եք հավատում և ինչ եք փոխել:
Դուք չէիք հավատում, որ ես կլինեմ ՀՀԿ կենտրոնական շտաբի պետը, չէիք հավատում, որ կլինեմ համամասնական ցուցակի երկրորդ տեղում. Իսկ ես հավատում էի, ուրեմն հավատանք, որ փոխենք: